Peshëngritja shqiptare është përfshirë në një incident të rëndë gjatë një turneu që është zhvilluar në Bosnje.
Raportohet se skena të paprecedenta dhune janë regjistruar brenda familjes së peshëngritjes, ku dy palë brenda grupit të pjesëmarrësve janë përleshur fizikisht me njeri-tjetrin, me konfliktin që ka agravuar deri në përdorimin e thikës.
Për ngjarjen në fjalë ka reaguar edhe zyrtarisht Federata Shqiptare e Peshëngritjes, që akuzon Presidentin e klubit sportiv “Kamza 2021”, Dashamir Çajka, se ka sulmuar me thikë trajnerin e ekipit Kombëtar, Bashkim Nikolla dhe sportistin Bekim Gripshi.
KOMUNIKATA ZYRTARE E FEDERATËS SË PESHËNGRITJES
Në këtë status do të gjeni videon e Z.Dashamir Caika duke sulmuar dhe dhunuar me thikë trajnerin e Ekipit Kombëtar Z.Bashkim Nikolla dhe sportistin e tij Z.Bekim Gripshi.
Në atë aktivitet Z.Bashkim ka qenë shef i delegacionit për aktivitetin në Bosnje. Pasi Z.Dashamir ka kërkuar të jetë pjesë e këtij aktiviteti me sportistë që nuk e meritonin dhe federata e ka kundërshtuar këtë kërkesë.
Z.Dashamir ka sulmuar me thikë Bashkim Nikollën dhe Bekim Gripshin duke menduar se Z.Nikolla ka refuzuar kërkesën e tij. Bëjmë me dije opinionin publik se këto video do të paraqiten ditën e hënë në Prokurori dhe u kërkojmë organeve të drejtësisë të marrë masa përsa i përket kësaj çështjeje tejet serioze.
Bëjmë me dije Z.Rakip Suli në cilësinë e kryetarit të Bashkisë Kamëz, Komitetin Olimpik dhe Presidentin e saj Z. Fidel YIli dhe organet kompetente për këtë çështje.
Këta njerëz dhunues, të inkriminuar dhe dashakeqë të heqin duart nga sporti dhe vendi ynë.
