“Vjen me një mision të kobshëm”. Kështu u shpreh kryedemokrati Sali Berisha gjatë prezantimit të kandidatit të opozitës për Bashkinë, Ardit Cikuli, teksa nxori në pah faktin se Oltion Çaçi nuk ka asnjë lidhje me qytetin bregdetar përveç interesave klienteliste të grupeve të caktuara kriminale pranë PS.
Berisha e akuzoi kandidatin socialist si përfaqësues të mafies së Durrësit, e cila po kërkon terrene të reja për t’u vendosur, pasi sipas Berishës e ka të qartë humbjen e Emirjana Sakos përballë Igli Carës.
“Po marrim kandidatët, ja ku është zoti Cikuli, ja ku është zoti Shero. Ku është ai kandidati i Sarandës, a e dini ju kush është ai? Ju se njihni asnjë, nuk e njeh asnjë socialist. Ju them unë kush është ai. Asnjë socialist nuk e njeh. Ai vjen nga Durrësi, ai vjen me mision të kobshëm, ai vjen për të sjellë këtu mafian e tmerrshme të Durrësit.
Sepse e shofin se Durrësi po u ikën, Igli Cara do të fitojë dhe tani kërkojnë zona për veprimtarinë e tyre kriminale dhe mendojnë se mund të mashtrojnë sarandiotët. Po nga doli ai njëherë. Po si ka mundësi që Saranda me këta burra, me këto gra, me këta të rinj, të mos ketë një njeri për ta kandiduar, por do ta sjellim nga Durrësi pasi ka bërë shkollën e mafias së Durrësit. Ky është kandidati, ky është vlerësimi i Edi Ramës për Sarandën”, u shpreh Berisha.
Lideri i opozitës nuk shmangu as kritikat drejtuar kryeministrit Edi Rama për kërcënimin e hapur që i bëri sot qytetarëve në takimin elektoral, në Kamëz.
Sipas Berishës, paralajmërimi i Ramës ishte i qartë, se bashkitë që do të votojnë kandidatët e opozitës nuk do të marrin financime nga qeveria, por kryedemokrati nënvizoi se kryeministri do t’i nxjerrë lekët një e nga një.
“Sot Edi Rama ishte në Kamzë dhe foli si një pushtues i egër. Pati paturpësinë ti thotë qytetarëve të Kamzës, se po nuk votuat Rakip hajdutin nuk do të keni para, nuk do të keni para. Ja them këtu para jush, do të ti nxjerrim një nga një dhe mos guxo, se absolutisht pas 14 majit, kohërat tuaja janë të numëruara dhe do të ndjekësh fatin e mafias tënde.
Çfarë ndodh miqtë e mi. E përgëzoj Fatmirin, foli për socialistët me një respekt të palëkundur. Unë u them sot, se shqiptarët, është një moment për tu bashkuar, çfarë do partie që janë. Sekti i rilindjes është sekti më i egër, është sekti më i keq, është fara më e keqe që ka parë kjo tokë ndonjëherë”, tha Berisha.
