Më pak se 25 ditë i ndajnë qytetarët nga zgjedhjet e 14 majit, kur do t’i drejtohen kutive të votimit për të zgjedhur drejtuesit lokalë që do të menaxhojnë bashkitë për katër vitet e ardhshme.
Fakti që vendi ka hyrë zyrtarisht në fushatë elektorale nuk i ka penguar aspak kryebashkiakët aktualë që të lëvrojnë miliona euro nga paratë e taksapaguesve për asfalt elektoral dhe vepra të tjera infrastrukturore në shkelje të Kodit Zgjedhor.
Në 61 bashkitë e vendit denoncohen thuajse çdo ditë rrugët e shtruara për fushatë nga drejtuesit socialistë të bashkive, por “perla” e këtyre zgjedhjeve vjen nga Tirana, ku Erion Veliaj ka krijuar korsinë e biçikletave më të pazakontë të historisë.
Një rrip i ngushtë rreth 5-10 cm që ndan trotuarin me gjerësi vetëm 55 cm të rrugës “Tish Daia” nga korsia ku qarkullojnë makinat, është kamufluar nga punonjësit e bashkisë Tiranë si një korsi biçikletash.
Sinjalistika e ngjashme me barrierat që ndajnë korsitë e biçikletave në kryeqytet është vendosur në këtë rrugë të Njësisë Administrative Nr.5 vetëm pak ditë më parë.
Këmbësorët dhe përdoruesit e biçikletave janë bërë konfuzë, teksa është bërë thuajse e pamundur që nënat me karroca fëmijësh të kalojnë në rrugën kryesore të “Komunës së Parisit” për shkak se edhe hapësira e trotuarit është e pamjaftueshme për shkëmbimin mes dy personave.
Qytetarët për mediat kanë ironizuar punën e bashkisë, duke u shprehur se gjithçka bëhet pa plan, pasi “aty nuk kalon dot as një tufë dhish”.
“Ajo s’është normale fare. Se aty s’kalon robi jo më biçikleta”, tha një banor i zonës.
“Ajo korsia nuk është e mirë, por do dhe nja gjysmë metri akoma. Këtu dhe një tufë dhish nuk kalon dot. Është pa plan”, u shpreh një tjetër.
Ndërkohë një çift të moshuarish deklaroi: “I ngushtë është. Rreziku është normal”.
