Shaban Fejza, 41-vjeçari shqiptar që i mori jetën bashkëatdhetarit të tij, Santino Xhyra (27 vjeç) më 11 mars të vitit 2021 në qytetin e Barit, në Itali, është dënuar me 14 vjet e 4 muaj burgim.
Sipas mediave lokale, Gjykata dha dje vendimin për Fejzën, lidhur me krimin e ndodhur në lagjen Libertà të kryeqytetit pulian.
Një tjetër shtetas shqiptar, Ylli Mucollari (5 vjet e 9 muaj) dhe Vito Dammacco nga Bari (5 vjet e 3 muaj) u dënuan gjithashtu për tentativë zhvatjeje.
Vrasja që tronditi Barin ndodhi në një pallat në rrugën “Petrelli 22”, në godinën që menaxhohet nga Mucollari.
Në atë pallat, viktima ndante një apartament me një person tjetër, por të dy kishin kohë që nuk e paguanin qiranë dhe faturat.
Duke nisur nga kjo situatë, Mucollari, shpesh i ndihmuar nga Dammacco kishte nisur t’i kërkonte paratë me kërcënime të vazhdueshme me vdekje Santino Xhyrës dhe personit që jetonte me të.
“Kam një armë, do të qëlloj! Nëse nuk paguan, do të dërgoj në varreza”, ishin disa nga kërcënimet që Mucollari i kishte bërë të riut.
Ndërkohë, më 11 mars Mucollari kishte dërguar Fejzën, nipin e tij (dhe nga ana tjetër i interesuar për të marrë me qera banesën), për të mbledhur paratë e ngelura nga Xhyra.
Mes të dyve ka shpërthyer një sherr i dhunshëm. 41-vjeçari e goditi i pari Xhyrën me një shuplakë, çka bëri që konflikti të agravonte dhe 27-vjeçari t’i kthehej me grushte.
Në atë moment Fejza është larguar duke marrë një pistoletë dhe pasi është kthyer ka hapur zjarr ndaj Xhyrës, duke e goditur për vdekje në gjoks dhe në bark.
Krimi ndodhi në prani të shokut të Santino Xhyrës, që jetonte në të njëjtin apartament. Ai i tregoi policisë gjithçka kishte parë dhe kush ishte autori. Këto informacione ndihmuan në kapjen e Shaban Fejzës brenda pak orëve. Ai pranoi menjëherë vrasjen në gjykatë.
