Opinioni publik u trondit mbrëmjen e së hënës nga vrasja e një 20-vjeçari në “Rrugën e Dibrës” pranë gjimnazit “Partizani”. Ngjarja e rëndë që ndodhi pak para mesnatës në kryeqytet kishte për protagonist 18-vjeçarin Aksel (Axel) Hoxhaj, i cili mbetet në arrati pasi i mori jetë me disa goditje thike të riut Stivën Toshkëzi.
Vrasja e 20-vjeçarit ishte derivat i një konflikti të mbartur me dy të rinjve, pasi më parë ishin konfliktuar edhe fizikisht për një vajzë, e cila ishte në një lidhje dashurie me Toshkëzin.
Ishte Hoxhaj, i cili së bashku me mikun e tij po 18-vjeçar, Enzi Maze i zuri pritë të ndjerit shumë pranë banesës së tij. Rreth dy javë më parë 20-vjeçari e kishte rrahur atë pas një përplasje fizike në afërsi të Rrugës së Elbasanit, sepse i ngacmonte të dashurën e tij.
Të rinjtë e kishin lënë që të takoheshin mbrëmjen e së hënës për t’u sqaruar. Toshkëzi, i cili sapo kishte mbyllur punën si montazhier në një televizion në kryeqytet ra në pritën e dy 18-vjeçarëve, me Hoxhajn që sipas raportimeve e ka goditur me një hanxhar ose thikë të madhe në pjesën e brinjëve duke i shkaktuar vdekjen.
Ndërkohë detaje të reja janë zbardhur për ngjarjen pas arrestimit të Enzi Mazes. I riu, i cili ra në prangat e policisë pak orë pas ngjarjes, ka deklaruar përpara oficerëve të policisë gjyqësore se nuk ka lidhje të drejtpërdrejtë me viktimën, por ishte vënë në dijeni të konfliktit nga shoku i tij.
Maze ka shtuar se ka vetëm pak ditë që është kthyer nga Holanda ku është edhe me studime, por pasi ka takuar Akselin, ai i ka treguar se para disa kohësh ka pasur një konflikt me viktimën dhe pretendonte se ky i fundit e ka rrahur.
Më tej 18-vjeçari ka konfirmuar raportimet në media duke thënë se motivi i konfliktit të tyre ishte një vajzë, të cilën e pëlqente Akseli. Autori i ngjarjes ishte në të njëjtën klasë me vajzën, por ajo ishte në një marrëdhënie me Stivën Toshkëzin.
Maze ka deklaruar më tej se miku i tij i ka shprehur se do të takoheshin me viktimën, por nuk kishin lënë një datë fikse.
Ndërsa natën e ngjarjes sipas tij, i kanë bërë pritë 20-vjeçarit vetëm për t’u sqaruar. Enzi Maze ka shtuar se është përpjekur t’i ndajë, por situata ka agravuar për shkak se viktima ka pretenduar se Aksel Hoxha e shqetësonte vazhdimisht të dashurën e tij.
Sakaq, sa i përket 18-vjeçarit që mbetet në arrati ai njihej si person problematik në zonë dhe shkollë.
