“U emërua me valixhe me euro”. Kjo ishte akuza me të cilën ish-kryeministri Sali Berisha hapi prezantimin e kandidates së koalicionit “Bashkë Fitojmë” për bashkinë e Patosit për zgjedhjet e 14 majit, Sofije Alushaj.
Berisha u përpoq të theksonte se kandidati rival i Alushajt është përzgjedhur nga Partia Socialiste pas rolit të tij në OSHEE, në kohën kur kryeministri Edi Rama urdhëroi burgosjen e qytetarëve të cilët nuk paguanin faturën e energjisë elektrike.
Berisha akuzoi bashkëshorten e Fatjon Durajt po ashtu duke thënë se e shoqja e kandidatit të PS-së për Patosin është arratisur në Londër, pasi rezulton të jetë e shpallur në kërkim për vjedhjet në Hipotekën e Sarandës.
“Rama po të kishte një emër të dytë do të njihej si emër i së keqes. Kandidati i Ramës këtu është një shushunjë e pashpirt. Janë Fatjonët e OSHEE-së që prenë faturat e arrestimit të 38 mijë qytetarëve për energjinë elektrike. Askund në botë një çështje civile nuk trajtohet si çështje penale. Edhe në Librazhd Rama ka emërua dikë që është përgjegjës për burgosjen e të paktën 200 qytetarëve. Kanë kryer krime anti-kushtetuese. Por përse Rama ka kapur lopatën si punëtor i madh. Lopatën e ka kapur vetëm për t’u hedhur hi syve qytetarëve. Unë ju bëj thirrje juve, socialistëve të Patosit që nuk i ka pyetur kurrë njeri për Fationit, t’i kërkojnë Fationit të ballafaqohet këtu në skenë me Sofinë. Fationi u emërua me valixhe me euro. E shoqja e Fationit është në arrati në Londër. E shoqja është në kërkim, pasi ka bërë batërdi në Hipotekën e Sarandës”, tha Berisha.
Lideri i opozitës më tej i kërkoi qytetarëve të Patosit që të mos e pranojnë Durajn që të shkojë dhe t’u kërkojë votën pa dhënë më parë llogari për abuzimet me detyrën të bashkëshortes së tij.
“Mos e pranoni në asnjë mënurë në fushatë pa sjëllë të shoqen. Këta kanë humbur çdo cipë, s’kanë respekt për qytetarët. Po sille njëherë të shoqen para ligjit ti dhe pastaj hajde kandido. A ka fyerje më të madhe për qytetarin sesa të sjellësh një kandidat që ka të shoqen me mandate arresti? Kjo ndodh vetëm në Shqipëri, vetëm aty ku krimi ka gjithçka në dorë. Unë kam besim në ndershmërinë e qytetarëvëe të Patosit.
Nuk mund t’ja çelin kurrë derën atij. Edhe ky në Londër ishte, nga Londra ka ardhur këtu. Nuk ka ngel gjë tjetër vetëm se t’i nxjerrim nga burgu dhe t’i sjellim të kandidojnë për kryebashkiakë. Ndryshimet do të jenë shumë të mëdha. Ne jemi parti e mbështetjes së qytetarëve. Në vitet kur qeverisëm, investime të pamohueshme u bënë në Shqipëri”, u shpreh Berisha.
