Kryetari demokrat, Sali Berisha, në një konferencë për shtyp, denoncoi situatën e rendit në vend dhe e krahasoi Tiranën me Palermon e viteve ’50. Berisha shprehet se rendin në vend e ka në dorë krimi dhe mafia.
Nisur nga pengmarrja ndaj një vajze të re në Tiranë dhe duke cituar edhe rastin e kenianes së vrarë barbarisht, Berisha tha se jeta në Tiranë po bëhet gjithnjë e më e pasigurt.
Berisha deklaron se Tirana është sot, qytet ku dominon ligji i mafias. Ai shton më tej se “mafia e Tiranës është mafia më e rrezikshme e Evropës. Ajo tejkalon Ndraghetën, Sakra Korona Unitën, tejkalon të gjitha grupet mafioze, sepse kreu i saj është qeveria mafioze shqiptare.”
“Tirana sot shëmbëllen me Palermon e viteve ’50. Një vajzë, 26-vjeçare, u burgos e marrë peng në shtëpi nga i ashtuquajturi partner. Duke kryer ndaj saj një terror fizik dhe psikologjik tipik për strofullat e mafies në protektoratin e mafies.
Jeta në Tiranë bëhet gjithnjë e më e pasigurtë. Rendin në dorë e ka krimi dhe mafia.
U ndala në këtë rast dramatik, sepse muaj më parë, një vajzë nga Kenia, 19-vjeçare, që punonte në një kazino, u masakrua. Klithmat e saj ranë në vesh të shurdhër. Vrasësi është i sojit të qeverisë. Vetëm qeveria arrin të heshtë, të shkatërrojë, të rrënojë të gjitha provat për të mbrojtur ministrat e saj kriminelë që fshehin krimin.
Tirana është pra sot, qytet ku dominon ligji i mafias, ku dominon mafia.
Mafia e Tiranës, duke pasur parasysh se ka pushtetin, është mafia më e rrezikshme e Evropës. Ajo tejkalon Ndraghetën, Sakra Korona Unitën, tejkalon të gjitha grupet mafioze, sepse kreu i saj është qeveria mafioze shqiptare.
Dënoj me forcën më të madhe aktin e shëmtuar ndaj 26-vjeçares, indiferencën e treguar nga organet e rendit dhe në tërësi dorëzimin e sigurisë dhe rendit të qytetarëve në duart e organizatave kriminale nga një qeveri e lidhur kokë e këmbë me to,” tha Berisha.
