Dëshmitarja e parë në rastin ndaj ish-krerëve të Ushtrisë Çlirimtare të Kosovës (UÇK), ish-presidentit Hashim Thaçit, ish-kryeparlamentarëve Kadri Veseli e Jakup Krasniqi, si dhe ish-deputetit Rexhep Selimi, ka vazhduar me dhënien e dëshmisë edhe ditën e sotme.
Ashtu si dje, edhe për ditën e sotme ajo po dëshmon në seancë të mbyllur për publikun ku dhe i është deformuar zëri, ndërkohë që seanca zhvillohet me dyer të mbyllura pa praninë e medias dhe palëve të interesuara.
Gjithashtu, edhe pse ka sinjal dëshmitarja në gjyqin ndaj ish-krerëve të Ushtrisë Çlirimtare të Kosovës nuk shfaqet në asnjë moment.
Sipas kalendarit në faqen e Dhomave të Specializuara të Kosovës në Hagë, seanca ka filluar në orën 09:00 dhe do të transmetohet rreth 45 minuta me vonesë për publikun, për shkak të mbrojtjes së dëshmitarëve. Seanca të tilla pritet të ketë sot e nesër.
Gjykimi ndaj katërshes së UÇK-së nisi më 3 prill 2023, pas më shumë se dy vjetësh zvarritje të procesit.
Thaçi, Veseli, Krasniqi dhe Selimi po qëndrojnë në paraburgim në Hagë, prej nëntorit të vitit 2020.
Ata po akuzohen nga Zyra e Prokurorit të Specializuar me akuza për krime kundër njerëzimit, si përndjekje, burgosje, akte çnjerëzore, torturë, zhdukje dhe vrasje, si dhe me 4 pika për krime lufte si arrestim, ndalim arbitrar, torturë dhe vrasje të paligjshme.
Ata janë deklaruar të pafajshëm për akuzat që ditën e parë kur u bë leximi i tyre nga Specialja e Hagës.
