Berisha: Rilindja Urbane shpërdoroi 2.3 miliardë euro
Kryetari demokrat, Sali Berisha, në bashkëbisedimin që zhvilloi sot me qytetarët në median sociale akuzoi kryeministrin Edi Rama se me projektin e tij për “Rilindjen Urbane”, ka shpërdoruar 2.3 miliardë euro.
Ky projekt madhor i qeverisë Rama që nisi me pretendimin për rivitalizimin e qyteteve, sipas Berishës ka përfunduar me miliona të shpenzuara për pllaka dhe ka zhytur një sërë bashkish në faliment.
“Rilindja Urbane është projekti më i tmerrshëm për vjedhjet se çdo projekt tjetër. A mund të imagjinoni që për shtrimin me pllaka guri të shesheve të bashkive, të jenë shpenzuar 2.3 miliardë euro, të cilat së bashku nuk mund të shkonin më shumë se 400 milionë euro. Por aty është bërë një nga gropat më të mëdha të vjedhjes në këtë vend. E vërteta është se një seri bashkish janë tërësisht të falimentuara. Por, nuk mundet kurrë një njeri të qëndrojë duarkryq përpara të keqes. Kur sheh të keqen me sy, detyra më kryesore është ta ndalosh atë”, tha Berisha.
Më tej, ai vuri në dukje se shifrat që qeveria tenderon për prokurimet publike janë të frikshme, teksa shkojnë në 22 milionë euro për një kilometër rrugë, apo 7 milionë euro për një shkollë.
“Ka qenë viti 1992, gjithsej arka e shtetit kishte 4 milionë dollarë. 80 përqind e qytetarëve ishin të papunë. Por reforma dhe guximi për t’i ndërmarrë ato, bënë të mundur që çdo vit, të ardhurat të dyfishohen. Unë mund t’u them se qeveria e ardhshme nuk do ndërtojë kurrë rrugë me 24 milionë euro, por me 2, 3 milionë euro kilometri. Qeveria e ardhshme nuk do ndërtojë shkolla me 6 milionë euro, por me 700 mijë euro. Kryeministri i ardhshëm nuk do shpenzojë 22 milionë euro me fluturime me avion me dhomë gjumi, të blejë vazo 4 milionë euro. Nuk do lejojë kurrë që ministrat të ulen në dreka dhe darka me 10 mijë euro, apo që të udhëtojë 15 rrugë me helikopter për Peshkopi”, nënvizoi Berisha.
Lideri i opozitës gjithashtu theksoi se mundësitë janë të mëdha nëse vendoset ligji dhe qytetari në epiqendër të qeverisjes, ndaj sipas Berishës, PD nëse rikthehet në pushtet do t’i rikthehet edhe projektit të investimeve në zonat rurale.
“Në vitin 2005-2013, nga 11 mijë kilometra rrugë, 8400 ishin në Shqipërinë rurale. Përsëri mbeten rreth 3 mijë kilometra rrugë të paasfaltuara në zonat rurale. Mbeten të paktën edhe 300 ujësjellësa për t’u ndërtuar. Pra mbeten një seri investimesh të cilat ishin të domosdoshme në mënyrë që zonat rurale të kenë atë infrastrukturë që kanë lagjet e qyteteve. Duheshin edhe të paktën 2 miliardë euro. Gjithçka ndaloi. Ky projekt stopoi dhe u kthye çdo gjë në vendosjen e pllakave të gurit në sheshet e qyteteve.
Nuk ka diskutim se një Shqipëri rurale është kushti i të gjitha kushteve që Shqipëria të jetë një vend i zhvilluar. Ne i kthehemi zhvillimit rural si kusht për zhvillimin e Shqipërisë”, deklaroi Berisha.
