Nga sot Edi Ramën do ta shohim edhe duke moderuar.
Që nga momenti kur krijoi ERTV për të kanalizuar propagandën e qeverisë në një kanal personal, gjasat ishin që shkelësi i integritetit të medias, të përfundonte duke pasur një emision të vetin.
Edhe pse vetëm pas 10 viteve në pushtet, Rama ia doli që pas mbylljes e blerjes prej tij të mediave të caktuara, me një Podcast të titulluar “Flasim” të moderojë në ekran.
Në episodin e parë, Rama zgjodhi të vijojë propagandën me rritje rrogash që ka nisur në kuadër të fushatës elektorale për zgjedhjet lokale të 14 majit, duke ftuar në studion e tij 7 sportistët që dy ditë më parë i gradoi “Kolonelë”.
Duket se “Kolonelëve” më të rinj të Forcave të Armatosura të Shqipërisë, fill pas vendosjes së spaletave dalluese mbi shpatulla në ceremoninë e mbajtur në sheshin “Nënë Tereza”, u është dashur të plotësojnë një nga tekat e kryeministrit.
“Shtatë kampionë prej majave më të larta të sportit botëror, flasin në ditën e gradimit të tyre si kolonelë të Forcave të Armatosura Shqiptare, duke ndarë momente të bukura e momente të zymta të ngjitjes së tyre drejt majës”, shkruan Rama në postimin ku bashkëngjitet video e podcastit.
Pasi i dha gradën honorifike, Rama u ka vendosur kufjet për të dëgjuar bëmat e qeverisë së tij dhe premtimet për të mos i lënë sportistët në harresë dhe situatë varfërie, në një kohë kur këta të fundit ankohen në vijueshmëri për mungesë palestrash e kompleksesh sportive, apo shpërblimesh e dietash.
“Ka qenë një nga barrat shumë të rënda të problemeve dhe sekëlldive të harruara kjo e kampionëve që shkëlqejnë dhe më pas i përpin harresa dhe pasi lënë aktivitetin kthehen në njerëz të zakonshëm e pasi zbresin nga maja e Olimpit bien edhe në situata të papranueshme varfërie. Pensionin si kolonelë, nënkolonelë apo majorë në pension, për mua është lehtësim i madh pavarësisht se nuk kam qenë i niveleve që mund të krahasohem me ju”, u shpreh Rama.
Ndër të tjera, ai nuk kurseu batutat me boksierin Alban Beqiri, të cilën e pyeti se kë ka në mendje kur gjuan.
“Nuk fokusohemi te dikush, mundohemi të jemi sa më të qetë. Nuk bëjmë neglizhime, mund të jesh shumë i mirë dhe kundërshtari më i dobët të gjen pikën. Duhet të jesh shumë vigjilent”, u shpreh boksieri.
Por për të rikthyer fokusin te vetja, kryeministri i sugjeroi: “Mund të thoshe edhe që të kam mend ty. Rama ik, Rama ik?”.
