Presidentit francez Emmanuel Macron iu bë një pritje prej ylli rock-u në Kinë në një universitet që ai vizitoi përpara përfundimit të vizitës së tij tre-ditore në vend.
Pamjet e publikuara tregojnë turma që dyndeshin për të përshëndetur presidentin francez i cili e la Francën mes protestave për reformën e pensioneve kur u nis për vizitën e tij për të takuar homologun Xi Jinping.
Të premten në mëngjes, presidenti francez shkoi në qytetin e Guangzhou, ku qindra studentë e pritën me brohoritje teksa i kërkonin selfie ose shtrëngim duarsh.
Sipas raportimeve, Macron foli me studentët në palestrën e kampusit dhe iu përgjigj pyetjeve të tyre para darkës me Xi dhe takimeve me investitorët kinezë.
Në Francë ndërkohë protestuesit të cilët kundërshtojnë reformën e pensioneve, i kanë vënë flakën një prej restoranteve të preferuara të presidentit.
Kujtojmë se në ditët e fundit është rritur presioni i ndërkombëtarëve mbi Kinën, presidenti i së cilës vizitoi Moskën ku u takua me homologun rus, Vladimir Putin. Ndonëse zyrtarisht Pekini e mban veten si neutral, Xi Jinping nuk e ka dënuar deri më tani pushtimin e Ukrainës dhe as nuk ka realizuar ende një bisedë telefonike me homologun e tij ukrainas Volodymyr Zelensky.
