Mbrëmjen e së martës një 38-vjeçar shqiptar është arrestuar në Pirgos të Greqisë, pasi autoritetet helene i kanë zbuluar vendin ku fshihte lëndën narkotike, që shpërndante në rrugët e qytetit.
Shqiptari kishte qenë në vëzhgim diskret prej tetorit të 2022-shit, pasi policia kishte informacione se ai kishte shitur drogë të paktën 190 herë te 33 përdorues të ndryshëm në Pirgos dhe kishte fituar më shumë se 35 mijë euro.
Por hetuesit prisnin që ai t’i çonte në bazën e tij ku edhe fshihte drogën, ndaj ata e kanë ndjekur 38-vjeçarin dhe e kanë vënë në pranga kur e kanë parë duke shkuar në një zonë agropylltarie në Skafidiia.
Pasi u arrestua, qeni nuhatës ‘Spike’ kontrolloi ambientet, duke zbuluar 23 pako me gjithsej 670,8 gram kanabis të papërpunuar, 157,7 gram kokainë dhe një peshore elektronike.
Ndërkohë, gjatë kontrolleve që pasuan në shtëpinë dhe automjetin e 38-vjeçarit, u gjet një presë mekanike dhe një kallëp metalik për standardizimin e kokainës, të cilat u sekuestruan së bashku me celularët e tij dhe 2215 euro.
“Klientët” e trafikantit të drogës u identifikuan dhe ndaj tyre është ngritur procedimi për blerje dhe posedim të lëndëve narkotike, ndërsa 38-vjeçari po procedohet për veprën penale të “posedimit dhe trafikut të lëndëve narkotike”.
