Detaje të reja kanë dalë në dritë nga sherri i dhunshëm, i ndodhur më 31 mars në zonën e ish-Bllokut në kryeqytet, ku pas lëndimeve të marra në kokë ndërroi jetë pas 5 ditësh në spital, 46-vjeçari Gentian Talja.
Mësohet se ngjarja ka ndodhur në orën 02:00 pas mesnatës në një prej rrugëve më të frekuentuara gjatë fundjavës, “Vaso Pasha”.
Fillimisht 25-vjeçari Henri Gjapi është konfliktuar me Gentian Taljen.
Ata kanë nisur të përplasen fizikisht pas një konflikti të çastit, pasi nuk njiheshin me njëri-tjetrin. Për t’i ndarë ka ndërhyrë personi i tretë, Artur Gjolena, i cili po ashtu ka qenë një kalimtar i rastit dhe nuk i njihte Gjapin e Taljen.
Nga pamjet filmike që grupi hetimor posedon, rezulton se si pasojë e goditjeve, pak çaste pasi palët ishin ndarë nga përleshja Gentjan Talja humbet ndjenjat.
Ai është rrëzuar në trotuar dhe në këtë moment, koka i është përplasur në bordurë.
Forca e përplasja i ka shkaktuar 46-vjeçarit plagë të rënda dhe prej 5 ditësh ai ndodhej i shtruar në spitalin e Traumës, por ditën e djeshme është futur në intubim dhe më pas ka ndërruar jetë.
Sakaq, policia nuk e ka njoftuar sherrin në ish-Bllok kur ka ndodhur por vetëm pas vdekjes së 46-vjeçarit. Ndërkohë, për ngjarjen po hetohet Artur Gjolena (41-vjeç) dhe është shpallur në kërkim Henri Gjapi, të dy banues në Tiranë.
Dyshimet janë se protagonistët e sherrit ishin në gjendje të dehur në momentin që nisën të godasin njëri-tjetrin me grushte.
NJOFTIMI I POLICISË
Specialistët për Hetimin e Krimeve të Komisariatit të Policisë Nr. 2 kanë referuar materialet në Prokurori, për shtetasin A. Gj., 41 vjeç, dhe kanë shpallur në kërkim shtetasin H. Gj., 25 vjeç, të dy banues në Tiranë.
Më datë 31.03.2023, në rrugën “Vaso Pasha”, shtetasi H. Gj. është konfliktuar me shtetasin G. T., 46 vjeç, i cili për shkak të dëmtimeve është dërguar në spital, për ndihmë mjekësore.
Gjatë këtij konflikti, ka ndërhyrë edhe shtetasi A. Gj., i cili ka goditur shtetasin H. Gj. Si pasojë e dëmtimeve, 46-vjeçari ka ndërruar jetë në spital, ditën e djeshme. Vijon puna për kapjen e shtetasit H. Gj.
