Vila e Albina Mançkës (ish-bashkëshortja e Ahmetajt) në kompleksin rezidencial “Green Coast” dhe banesa e Erjola Hoxhës (bashkëjetuesja e Ahmetajt) në kompleksin “Vala Mar” do të qëndrojnë në sekuestro preventive.
Dy objektet janë sekuestruar nga SPAK pasi Ahmetaj është në hetim për shpërdorim detyre, fshehje pasurie dhe pastrim parash.
Arben Ahmetaj ka ankimuar në Gjykatën e Posaçme kundër Korrupsionit dhe Krimit të Organizuar masën e sekuestros që SPAK i vuri mbi dy pasuri të paluajtshme.
Në kërkesën e tij në GJKKO, ish-ministri e quan masën e sekuestros si të paligjshme.
Edhe në rastin e kontrolleve që BKH ushtroi në banesat e tij, Ahmetaj dhe partnerja ankimuan gjetjet, por GJKKO e rrëzoi kërkesën. Kreu i SPAK, Altin Dumani tha se Ahmetaj po hetohet dhe po gjurmohet pasuria e tij, pasi sipas tij, nga kontrolli në vila janë gjetur prova.
