Pohimin në një mbledhje të Kryesisë së PS pak ditë më parë ku u kërkoi të vetëve që të mobilizoheshin maksimalisht pasi zgjedhjet e 14 Majit nuk do të jenë të lehtë, kryeministri Edi Rama duket se e konfirmoi sot në daljen për medias pas mbledhjes së Këshillit të Ministrave.
Premtimi i Ramës për një shpërblim prej 5 mijë lekësh të rinj për pensionistët në muajin e ardhshëm, tregon qartë se makineria elektorale e PS nuk do t’i mjaftojë për të fituar përballë koalicionit Berisha-Meta.
“Jemi në kushtet kur mund t’iu themi edhe pensionsionistëve Zotimin për të shpërndarë në radhë të parë drejt tyre taksën e jashtëzakonshme që vumë mbi eksportuesit e mëdhenj të energjisë, do ta mbajmë. Për pensionistët do të ketë 5 mijë lekë të reja në drejtim të tyre, bashkë me pensionet që do të marrin herën e ardhshme”, u shpreh Rama.
Edhe pse Kodi Zgjedhor e ndalon që vendime të tilla qeveria t’i marrë 4 muaj para zgjedhjeve, Rama nuk u duk aspak i shqetësuar pasi tha se askush nuk mund t’i ndalojë për të tilla nisma.
Duke e cilësuar forcën e ligjit (që ai nuk do ta njohë) një kinezëri të sistemit, shefi i qeverisë e pranoi hapur se blerja e pensionistëve me lëmoshën prej 5 mijë lekësh do të vazhdojë pavarësisht çdo kundërshtie.
“Është një adresim në vazhdim i një problemi që nuk ndjehet se qeveria është aty në mbrojtje të konsumatorit. Ne s’mund t’i themi pensionistëve që nga taksa s’mund të merrni gjë se janë ca zgjedhje vendore dhe do prisni katër muaj se kështu kanë vendosur partitë me ato kinezëritë. Kjo s’mund ti shkojë në mend njeriu se mund të na pengojë ne për të shpërblyer pensionistët”, theksoi ai.
Por çfarë thuhet në Kodin Zgjedhor për vendime të tilla?
Duke ju referuar nenit 91 të Kodit Zgjedhor, Rama e ka shkelur hapur atë, pasi 50 ditë para zgjedhjeve qeveria vendos t’u japë 5 mijë lekë shpërblim pensionistëve.
Sipas këtij neni në një periudhë 4 muaj para zgjedhjeve ndalohen vendime me efekte financiare si rritje pagash e pensionesh, ndryshime në politikat fiskale, si dhe investime të paparashikuara në buxhetin e shtetit.
“Katër muaj para datës së zgjedhjeve deri në formimin e qeverisë së re pas zgjedhjeve ndalohet propozimi, miratimi ose nxjerrja e akteve ligjore ose nënligjore, të cilat parashikojnë dhënien e benefiteve për kategori të caktuara të popullsisë, të tilla si aktet që parashikojnë rritjen e pagave, pensioneve, mbështetjes ekonomike apo sociale, uljen ose heqjen e taksave, vendosjen e amnistive fiskale, privatizimin apo dhënien e pasurive a të shpërblimeve etj, përveçse kur nisma kushtëzohet nga gjendje të fatkeqësisë natyrore”, thuhet në pikën 4 të nenit 91 të Kodit Zgjedhor.
