Një sasi rekord kokaine në posedim të një personi të vetëm, është zbuluar ditën e djeshme nga skuadra “Fluturuese” e policisë së Livornos.
Protagonisti i operacionit antidrogë është një 30-vjeçar shqiptar, të cilit iu gjet në shtëpi 40 kg kokainë, e fshehur në një karrocë që ishte stacionuar në aneksin e banesës.
Agjentët, gjatë një shërbimi për parandalimin e trafikut të drogës, vunë re në La Kaliforni (Bibbona) shqiptarin, i cili u duk i dyshimtë, teksa me kujdes të sforcuar hyri brenda një oborri përballë një ndërtese.
Policët e ndaluan menjëherë dhe 30-vjeçari u “zbërthye” në sekonda duke rrëfyer se kishte drogë të fshehur brenda një karroce në shtëpinë e tij.
Brenda aneksit, oficerët gjetën një karrocë të madhe me mbështjellje të shumta kokaine, me një peshë totale rreth 40 kilogramë.
Lënda narkotike ishte e ndarë në “blloqe” me peshë 1 kg secila. Vlera e drogës së sekuestruar do të shkonte në rreth 1.5 milionë euro.
Sipas hetuesve nëse kokainë do të shitej me pakicë në sheshe, do të arrinte një fitim me vlerë disa milionë euro.
Ndërkohë, shqiptari i arrestuar akuzohet për posedim kokaine me qëllim shpërndarjen. Ai u dërgua në paraburgimin “Le Sughere” në Livorno, në dispozicion të Autoritetit Gjyqësor.
