Pas ndryshimit të pronarëve situata në televizionin “ABC News” është transformuar 360 gradë. Jo vetëm politika editoriale, programacioni madje edhe shumë gazetarë që kanë qenë pjesë e ekipit themelues të këtij televizioni kanë vendosur që të largohen kjo për shkak të drejtuesve të rinj.
Së fundmi, gazetari i njohur Enkel Demi ka shpërthyer me kritika ndaj pronarëve të këtij televizioni që kanë spostuar dhe shkurtuar emisionin e tij duke i dhënë më shumë hapësirë homologut të tij, Bashkim Hoxhës, të bashkuar së fundmi me “Abc News”.
Demi thotë se fjalën e tij të lirë nuk e ndal dot askush, ndërsa thekson se me këta pronarë kanë shkaktuar një kaos pasi sipas tij nuk dinë të menaxhojnë një televizion kombëtar, duke ngritur shumë mistere se gjithçka po përdoret për interesa të ngushta biznesi.
“ABC e mëngjesit” startonte në orën 07.00, ndërsa nga sot do të nisë në orën 08.00, pasi në 07.00 është Bashkim Hoxha. Demi ka ironizuar situatën në televizion duke thënë “Kështu vajti kjo punë shto ujë e shto miell. Duke nisur nga sot do të shihemi në orën 08.00, jo nga dëshira jonë, por kështu si është bërë kjo puna e ABC shto ujë e shto miell, ja ku jemi. Ju urojmë gjithë të mirat Bashkim Hoxhës, i cili filloi sot. Ishin pak surprizë të gjitha këto lëvizje, por Bashkimi mbetet një mik. Tek e fundit bën punën tij, për të tjerat nuk ia vlen të diskutojmë. Unë nuk kam qenë dakord kurrë të ndodhin gjithë këto gjëra që ndodhin në ABC“, tha fillimisht gazetari.
Gazetari i njohur gjatë hyrjes së emisionit kritikon me anë të ironisë drejtuesit e televizionit, duke pohuar se kanë fantazi për ta bërë këtë televizion po e bëjnë shumë mirë, sa me këmbë e sa me duar.
“Ju besoj e dini që kam mbetur i vetëm, trim në luftë. Nuk më heqin nga puna gjë që do të thotë se ABC e mëngjesit do të vazhdojë, nuk është e vërtetë se nuk kam menduar të iki vetë, kam dashur me ik, por në fund mu kujtua një varg i Migjenit që thoshte “do mbetem thumb i ngulur në trutë e njerëzisë”. Kështu e 5 minuta po më lanë do dal në televizion dhe do them atë që mendoj. Tjerat pastaj s’ka nevojë t’i diskutoj, ata që kanë fantazi për ta bërë këtë televizion po e bëjnë shumë mirë, sa me këmbë e sa me duar e kështu me radhë” tha Enkeld Demi.
Kujtojmë që ABC News është kritikuar edhe nga kreu i Partisë Demokratike, Sali Berisha i cili ka thënë se ky televizion pasi kaloi në dorën e vëllezërve Devolli nga Kosova, gjithçka tashmë është në shërbim të Edi Ramës kjo për interesat e ngushta që dy palët kanë me njëri-tjetrin.
Berisha gjithashtu hodhi akuza se pronarët e një birre të njohur në Kosovë, detyruan qeverinë shqiptare që të bëjë ndryshime të “imponuara” për akcizën e birrës, pra “de facto” asgjësimin e birrës në Shqipëri”.
