Një aksident i rëndë me një viktimë është regjistruar në orët e para të mëngjesit në autostradën Fushë Krujë-Thumanë.
Mësohet se drejtuesi i një automjeti, i identifikuar nga policia si 34-vjeccari me iniciale J.K. ka humbur kontrollin e makinës dhe është përplasur me mbrojtëset metalike të rrugës.
“Në orët e para të mëngjesit, në autostradën Fushë Krujë-Thumanë, një automjet me drejtues shtetasin J. K., 34 vjeç, ka humbur kontrollin mbi drejtimin e automjetit dhe për pasojë automjeti është përplasur me trafik-ndarësen. Nga përplasja e automjetit me trafikndarësen ka humbur jetën pasagjeri, shtetasi L. D, rreth 50 vjeç”, njoftonin uniformat blu.
Përplasja e fortë i ka shkaktuar vdekjen e menjëhershme 50-vjeccarit Luan Dukaj, i cili ishte pasagjer në automjet.
Përveç viktimës, tre persona të tjerë raportohet se ndodhen në gjendje të rëndë dhe janë transportuar në drejtim të spitalit të “Traumës”.
Dyshohet se shkak i aksidenti ka qenë shpejtësia tej normave të lejuara, por edhe lagështia në rrugë.
Policia ndodhet në vendin e ngjarjes për të bërë të mundur edhe zbardhjen e shkaqeve të këtij aksidenti të rëndë.
