Kreu i Partisë Demokratike, Sali Berisha ka ankimuar në Kolegjin Zgjedhor vendimin e KAS për të lënë jashtë zgjedhje lokale të 14 majit kandidatët e Primareve.
Në dokumentin me firmën e Berishës kërkohet nga Kolegji një vendim për çregjistrimin nga zgjedhjet lokale të Partisë Demokratike me kryetar të komanduar Enkelejd Alibeajn.
Në dokument gjithashtu nënvizohet se kërkohet regjistrimi në garën e 14 majit të PD-së me kryetar Sali Berishën.
Gjithashtu kërkohet që PD të jetë pjesë e koalicionit opozitar “Bashkë Fitojmë” me siglën e të cilit do të garojnë kandidatët e dalë nga Primaret.
Më 3 Mars, Gjykata e Apelit rrëzoi vendimin e Agron Zhukrit të datës 25 mars 2022 dhe kthimin e çështjes për rigjykim në Shkallën e Parë, por me një trupë gjykuese tjetër. Sipas vendimit, vula, sigla, logoja e Partisë Demokratike i mbetet Lulzim Bashës.
Pas këtij vendimit, përfaqësuesi ligjor i PD, Indrit Sefa tha se do nisin procedurat për largimin e emrit të Bashës, e më pas regjistrimit në KQZ.
Celibashi shtoi se dokumentacioni i grupimit të Enkelejd Alibeajt është i paplotë. Gjashtë ditë më parë, edhe deputeti Enkelejd Alibeajt dorëzoi në Komisionin e Ankimimeve dhe Sanksioneve ankesën kundër KQZ-së për mos-regjistrim në zgjedhjet e 14 majit. Indrit Sefa në rolin e Sekretarit të Çështjeve Ligjore dhe Zgjedhore shoqëroi ankesën me argumente se pse duhet të regjistrohet në zgjedhje.
Më pas, në një mbledhje tjetër KAS detyroi KQZ të regjistrojë PD me kryetar të komanduar Alibeajn.
Anëtarët e KAS-it vlerësuan se deklarata e solemnitetit që është firmosur nga Alibeaj dhe jo nga Basha siç e kërkonte kreu i KQZ-së është e vlefshme.
Më pas, kryekomisioneri Celibashi respektoi vendimin e KAS për regjistrimin e PD të Alibeajt. Gjatë asaj mbledhje, Celibashi regjistroi koalicionin ‘Bashkë Fitojmë’ në zgjedhjet e 14 majit, duke bërë pjesë partitë: Partia e Lirisë, Partia Uniteti për të Drejtat e Njeriut si dhe Partia Demokristiane, por la jashtë PD duke u shprehur se sigla e PD-së së Berishës nuk mund të jetë pjesë e koalicionit.
