Orges Bilbili dhe Anterio Kaloshi do të qëndrojnë në burg deri në fund të jetës së tyre. Gjykata e Posaçme e Apelit, ka lënë në fuqi këtë të hënë, dënimin e dhënë më herët nga Shkalla Parë.
Në Janar të këtij viti, Gjykata e Posaçme dënoi me burg të përjetshëm Orges Bilbilin dhe Anterio Kaloshin, të akuzuar për vrasjen e dyfishtë në Lushnje në vitin 2017. Gjykata shpalli vendimin pas një seance e cila zgjati rreth 6 orë, ndërkohë mbrojtja kërkoi pafajësi.
Në kërkim për këtë ngjarje vijon të jetë Laert Haxhiu, i konsideruar si organizator i vrasjes. Haxhiu po gjykohet në një proces paralel në mungesë. Në atentatin e 2017, mbetën të vrarë Zamir Latifi e Jurgen Hoxha, si dhe u plagos Marjus Xhepexhiu.
Dy viktimat njiheshin për lidhjen e tyre me Xhulio Shkurtin, nipin e Aldo Bares dhe sipas SPAK, ky i fundit ka qenë edhe objektiv i atentatit, ndërsa zanafilla e hakmarrjes lidhet me konfliktet e vjetra të Bandës së Lushnjes.
Ngjarja e rëndë e regjistruar në 11 tetor të 2017 në lagjen “Loni Dhamo”, pasonte një tjetër tentative për vrasjen e Xhulio Shkurtit. Ishte Prokuroria e Lushnjës që në korrik të 2020-ës me vendim gjykate shpalli në kërkim këta persona si autor, ndërsa hetimet i mori Prokuroria e Posaçme për shkak të organizimit si grup kriminal.
