Apeli i Gjykatës së Posaçme ka lënë në fuqi vendimin e GJKKO-së për lënien për 1 vit në regjimin e posaçëm “41 Biss” të Anterio Kaloshit.
Nëpërmjet avokatit të tij i dënuari me burgim të përjetshëm kërkoi shfuqizimin e vendimit me pretendimin se nuk ka shfaqur as rrezikshmëri dhe nuk ka kryer shkelje brenda ambienteve te burgut. Por, kërkesa e tij nuk është marrë në konsideratë nga Apeli, teksa vendimi është marrë nga gjyqtarja Nertina Kosova.
Vlen të theksohet fakti se në seancën e mbajtur në Qershor në GJKKO, gjykata pasqyroi disa informacione te klasifikuara sekret ku flisnin për disa informacione mbi Anterio Kaloshin brenda ambienteve te burgut.
Anterio Kaloshi akuzohet për masakrën e ndodhur në Lushnjë në vitin 2017, së bashku me Laert Haxhiun ku u ekzekutuan me armë Zamir Latifi e Jurgen Hoxha, si dhe u plagos Marius Xhepexhiu. Ai gjithashtu ka fshehur dhe strehuar Orges Bilbilin, i arrestuar në prill të 2020, po ashtu një nga autorët e masakrës së Lushnjës.
Vendimi:
Gjykata e Posaçme e Apelit për Korrupsionin dhe Krimin e Organizuar, me trup gjykues monokratik të përbërë nga gjyqtarja Nertina Kosova, sot më 17.09.2024, shpalli vendimin mbi çështjen penale nr. 164 akti, datë 18.07.2024 regjistrimi, regjistruar mbi ankimin e të dënuarit/ankues Anterio Kaloshi, me objekt: “Ankim ndaj vendimit nr. 237, datë 28.06.2024 të Gjykatës së Posaçme të Shkallës së Parë për Korrupsionin dhe Krimin e Organizuar, shfuqizimin e urdhrit të Ministrit të Drejtësisë “Për vendosjen në regjimin e posaçëm të ushtrimit të të drejtave në burgun e sigurisë së lartë të të burgosurit Anterio Kaloshi” dhe vendosi:
– Miratimin e vendimit nr. 237, datë 28.06.2024 të Gjykatës së Posaçme të Shkallës së Parë për Korrupsionin dhe Krimin e Organizuar.
