Një ndodhi e pazakontë në seancën për rivlerësimin e masës së sigurisë për të arrestuarit për shkeljet e dyshuara me tenderin e ujësjellësit në Bashkinë Bulqizë (mes tyre dhe kryebashkiaku Lefter Alla), nxori në pah mosrakordimin e strukturave ligjzbatuese në vend.
Njëri prej personave që ishte raportuar nga SPAK si i arrestuar nga policia me vendim të GJKKO, rezultoi të ishte ende i lirë.
Leonard Daçi, sekretar i përgjithshëm i Bashkisë dhe anëtar i Komisionit të Vlerësimit të Ofertave, u paraqit befas në GJKKO rreth 2 orë pas nisjes së seancës.
Ai shkoi i shoqëruar nga avokati, ku trokiti në dyert e sallës duke vënë në dijeni trupën gjykuese se ishte një nga të pandehurit e dosjes dhe ndaj tij ishte marrë në mungesë masa e sigurisë “arrest me burg”. E teksa ishte në banesë, pretendoi ai, dëgjoi emrin e vet që përmendej në media si një nga të arrestuarit, por në fakt ndodhej në Tiranë.
Daçi shtoi se njoftoi avokatin duke i kërkuar mendim, i cili i sugjeroi të paraqitej në gjykatë. Aktualisht, Daçi ndodhet brenda sallës së gjyqit, por pozicioni i tij u la të vlerësohet në një moment të dytë.
Leonard Daçi, akuzohet nga SPAK për kryerjen e veprës penale “Shkelja e barazisë së pjesëmarrësve në tendera apo ankande publike”.
Më 16 Mars, Prokuroria e Posaçme njoftoi se Daçi ishte arrestuar nga policia në zbatim të një vendimi të GJKKO dhënë më 14 Mars. Megjithatë, këtë të Shtunë, u zbulua se vendimi i arrestit me burg në mungesë nuk ishte zbatuar, teksa vetë i akuzuari trokiti në derën e gjykatës.
Në seancën e sotme, GJKKO la në fuqi ndaj Daçit masën e arrestit me burg. Këtë herë, gjasat janë që mos ti shpëtojë dot arrestimit…
