Fakti që Komisioni i Ankesave dhe Sanksioneve detyroi sot KQZ-në të regjistrojë Enkelejd Alibeajn si kryetar të komanduar, me logon e Partisë Demokratike në zgjedhjet lokale të 14 majit, duket se nuk ka ngjallur ndonjë entuziazëm të veçantë në radhët e deputetëve që janë rreshtuar krah tij.
Për Ferdinand Xhaferraj, regjistrimi i grupit “Alibeaj” ishte një vendim i padiskutueshëm nga ana juridike, por deputeti e ka mëse të qartë se opozita e vërtetë në vend është ajo që drejton Sali Berisha.
Xhaferraj tha për News24 se ai shpreson që Berisha dhe kandidatët e tij të futen në zgjedhje me PD e “Alibeajt”, jo për të rikonfirmuar se ka opozitën më të madhe në vend, por për t’i dhënë një mesazh Edi Ramës se dëshiron t’a mundë.
“Edhe unë e perceptoj se shumica është andej, por nisur nga zhvillimet juridike, si kanë ecur nga dy Kuvendit, në mënyrë të padiskutueshme ka vendosur këtej. Unë e kam perceptimin si Celibashi, por unë kam të drejtë ta them, por ai jo. Nëse Berisha ka hyrë dhe një herë që të rikonfirmohet që është opozita më e madhe në vend, e ka të fituar, por mendoj se nuk duhet të hyjë me këtë synim, por me synimin për të larguar Ramën. E ka të konfirmuar këtë dhe e kemi pranuar edhe ne”, tha ai.
Xhaferraj në fund u dorëzua dhe pranoi se opozitën më të madhe në vend e drejton Sali Berisha, dhe sipas tij këtë e pranon grupimi “Alibeaj”.
Më tej deputeti demokrat tha se nuk do dalë të kërkojë te votuesit mbështetje me votë për kandidatët e dalë nga “Primaret”, por nënvizoi se as fushatë kundër tyre nuk do të bëjë.
“Unë pres që kandidatët e opozitës, të gjithë bashkë të bëjmë maksimumin, që të gjejmë formulën për të marrë maksimumin e votave. Në 14 maj e kam të pamundur të bëj fushatë kundër kandidatëve të Primareve, nuk do t’i mbështes, por fushatë kundër nuk do bëj”, u shpreh ai.
