Kandidati i Partisë Demokratike për Bashkinë e Elbasanit, Luçiano Boçi ka reaguar në prag të Ditës së Verës.
Përmes një postimi në rrjete sociale Boçi, ka shprehur trishtimin e tij për atmosferën e ‘vakët’, në këtë festë simbolike për qytetarët elbasanllinj.
Në postimin e tij, Boçi thekson se qytetarët e kanë të pamundur për të gëzuar siç duhet në këtë festë ashtu si tradita e kërkon, pasi kostot janë të papërballueshme.
Postimi i plotë:
Kushdo që e njeh Elbasanin dhe traditën e Ditës së Verës, e di që në këtë ditë tek ne nuk flitet veçse për gjëra të gëzuara. Optimizmi shkruan horizontin e botës dhe të njeriut.
Por sot dua ta them atë që më dhemb e më trishton për bashkëqytetarët e mi. I shoh dhe i dëgjoj kur më thonë për pamundësinë që kanë për të gëzuar siç duhet. Çmimet e çdo gjëje në Elbasan janë jashtëzakonisht të larta.
Festa mund të bëjë ende kuptim për fëmijët. Por për prindërit e tyre, për dëshirën e madhe të Elbasanasve për t’a shtruar begatshëm tryezën e mikpritjes, për zemrën e madhe të Elbasanit – këto kosto jetese janë absolutisht të papërballueshme.
E gjitha lidhet me mungesën e punës. Pa punë s’mund të ketë perspektivë dhe zhvillim. Elbasani i ka të gjitha mundësitë dhe resurset edhe për shkak të vendodhjes gjeografike që të krijojë dhe mundësojë hapësira të panumërta punësimi. Është e gjitha çështje vizioni!
Elbasani meriton të ketë festë! Elbasanin e presin ditë shumë më të mira!
