Një aksident me një person të plagosur ka ndodhur këtë të Hënë në Kukës.
Një automjet ka përplasur një person, i cili ka mbetur i plagosur rëndë dhe është transportuar drejt spitalit të Traumës në kryeqytet, për mjekim të specializuar.
“Sot, rreth orës 09:30, në qytetin e Kukësit, automjeti tip ‘Daimler Chrysler’ me drejtues shtetasin M. S., 39 vjeç, banues në Krumë, ka përplasur këmbësorin shtetasin D.Xh. Si pasojë e aksidentit, është dëmtuar këmbësori shtetasi D.Xh., i cili po merr mjekim të specializuar në spitalin e Traumës, Tiranë”, njoftoi policia.
Drejtuesi i automjetit është shoqëruar në Komisariatin e Policisë Kukës, për veprime të mëtejshme, shtuan të njëjtat burime, ndërsa në vendngjarje ndodhet grupi hetimor, i cili po kryen veprimet e mëtejshme në lidhje me sqarimin e rrethanave të aksidentit.
