Janë zhvilluar këtë të diel të gjitha sfidat e javës së 11-të në kampionatin e futbollit të vajzave. Një javë e mbushur me duele mjaft interesante që prodhoi edhe rezultate spektakolare.
Në derbin kryeqytetas, mes Tiranës dhe Kinostudios, vajzat bardheblu morën fitoren e parë në këtë fazë të dytë të kampionatit. Ekipi i drejtuar nga Aurora Seranaj triumfoi me rezultatin 6-0 ndaj Kinostudios, me gola të shënuar nga Vishkulli (4) dhe Coka (2). Një fitore që e mban ekipin e Tiranës në vendin e dytë në kampionat.
Ndërkaq, në takimin tjetër të javës, Vllaznia pati një ndeshje të lehtë në letër kundër Teutës. Kampionet në fuqi të vendit mundën me shifrat 13-0 vajzat durrsake në sfidën e zhvilluar ditën e sotme në stadiumin ‘Reshit Rusi’ në Shkodër. Golat në këtë sfidë u shënuan nga: Doçi (6), Vrucaj, Kodra, Franja (2), Gjini (2) e Mustafaj.
Një ndeshje tjetër mjaft interesante e kësaj jave ishte edhe derbi verior ‘Kukësi – Laçi’, me këto të fundit që buzëqeshën në fund, pasi dolën me tre pikë shumë të rëndësishme nga fusha. Laçi triumfoi me shifrat 0-5 në këtë sfidë, teksa fitorja e ngjit tashmë ekipin kurbinas në vendin e 6-të.
Sakaq, në juglindje të vendit u zhvillua edhe sfida e katërt dhe e fundit për këtë javë të 11-të mes Skënderbeut dhe Lushnjes, me korçaret që arritën të siguronin tre pikë nga kjo sfidë, duke triumfuar me rezultatin 2-1. Golat për korçaret u shënuan nga Kullira e Malaveci, ndërsa për lushnjaret realizoi Tashi.
Ndeshja Apolonia – Partizani është shtyrë për shkak të impenjimeve të futbollisteve me ekipet kombëtare dhe do të zhvillohet në një moment tjetër që do të përcaktohet nga Departamenti i Garave në FSHF.
Ndeshjet e javës së njëmbëdhjetë në Kampionatin Kombëtar të Vajzave:
Kinostudio – Tirana 0-6
Vllaznia – Teuta 13-0
Kukësi – KF Laçi 0-5
Skënderbeu – Lushnja 2-1
