Kompania e sondazheve “Terra World” e cila publikon herë pas here sondazhe me të dhëna mbi pëlqyeshmërinë e politikanëve në vend, së fundmi ka zbulua se në dy muajt e parë të vitit 2023 lista kryesohet nga kreu i Partisë Demokratike, Sali Berisha.
Sipas sondazhit kur na ndajnë edhe dy muaj nga zgjedhjet lokale të vitit 2023, pëlqimi i shqiptarëve për kryeministrin Edi Rama, që drejton vendin në mandatin e tretë radhazi ka rënë ndjeshëm.
Aty nënvizohet se 62.81% e shqiptarëve kanë pasur ‘mendim negativ’ për kryeministrin Edi Rama gjatë periudhës shkurt-mars 2023 dhe vetëm 37.19% janë shprehur me ‘mendim pozitiv’.
Ndërkohë për kryetarin e PD, Sali Berisha, po për të njëjtën periudhë kohore, vetëm 35.56% e shqiptarëve kanë ‘mendim negativ’ dhe 64.44% kanë ‘mendim pozitiv’.
Edhe në nëntor 2022, drejtuesi i “Terra World”, Blerim Gjeladini njoftoi se Sali Berisha është personi më i klikuar në rrjetet sociale në Shqipëri.
“Ne kemi bërë dhe një rankim në rang global, por dhe kombëtar kemi dy periudha, atë së fundmi, se kemi një ngjarje të re që është rikthimin e Berishës, i cili së fundmi është i pari. Ai vazhdon të jetë i pari për klikime në Facebook, pastaj vjen zoti Rama dhe të tjerët. Kemi një matje interesante për primaret që kanë sjellë një aktivizim të opozitës, sidomos në FB që janë më lartë se politikanët e tjerë në Shqipëri. Edi Rama është i dyti, por ka një trend negativ, krahasim me reagimin për postime”, u shpreh Gjeladini asokohe.
