Kjo e enjte edhe në mungesë të një séance plenare pritet të jetë një ditë shumë e ngarkuar dhe e mbushur me zhvillime të rëndësishme sa i përket jetës politike në vend, sepse KQZ pritet të “vulosë” fatin e Partisë Demokratike në lidhje me zgjedhjet lokale të 14 majit.
Komisioni Qendror i zgjedhjeve pasi regjistroi ditën e djeshme 42 forca politike për procesin e 14 Majit, do t’i duhet të vendosë sot për 7 subjekte të tjera që janë:
-Partia Socialiste e Shqipërisë
-Partia e Lirisë
-Bindja Demokratike
-Lëvizja për Zhvillim Kombëtar
-Lëvizja Bashkë
-Partia Demokratike e Shqipërisë (Kërkesa e Sali Berishës)
-Partia Demokratike (Kërkesa e grupit “Alibeaj”)
Vëmendja më e madhe do të përqëndrohet te Partia Demokratike, kjo edhe pas vendimit të Gjykatës së Apelit për të rikthyer për gjykim në Shkallë të Parë, çështjen e vulës së selisë blu, që është interpretuar si triumf nga grupi “Alibeaj”.
Ndërkohë, pas këtij regjistrimi paraprak, në 15 mars aplikohet për koalicionet dhe më pas, më 27 mars depozitohet lista e kandidatëve për kryetar bashkie dhe lista shumë-emërore e kandidatëve për këshillat bashkiak sipas përkatësisë së koalicionit apo partisë. Më pas hidhet nga KQZ shorti për renditjen në fletët e votimit dhe në prill pritet dhe shpërndarja e fondeve vjetore, por edhe për fushatën e partive politike.
Teksa punimet e KQZ kanë nisu, që prej orës 08:30 jo shumë larg këtij institucioni, në selinë e PS, kryeministri Edi Rama ka mbledhur kryesinë, duke pasur në fokus zgjedhjet e 14 majit.
Mësohet se anëtarët e Kryesisë së selisë rozë do të diskutojnë lidhur me kandidatët dhe organizimin e këtyre zgjedhjeve vendore.
Kujtojmë se një ditë më parë qëndroi për 30 minuta në seliën e PS edhe ambasadorja amerikane Yuri Kim, e cila zhvilloi një takim “kokë më kokë” me Sekretarin e Përgjitshëm, Damian Gjiknuri.
Kim më pas gjatë ditës zhvilloi takime edhe me Enkelejd Alibeajn dhe kreun e Partisë së Lirisë, Ilir Meta.
