Kryetari i PD-së, Sali Berisha u bëri apel arsimtarëve në një takim në kuadër të 7 Marsit, të bashkohen për të rrëzuar qeverisjen aktuale, që sipas tij është shndërruar në monizëm.
“Unë shfrytëzoj këtë rast për të ju drejtuar të gjithë mësuesve të Shqipërisë. Të angazhohen me të gjithë mundësitë e tyre, fuqitë e tyre, të bëhen promotorë të ndryshimit që presin shqiptarët dhe Shqipëria. Të ndryshimit jetik për të ndaluar këtë rrokullisje të madhe. Në 9 vite kemi humbur 1/3 e materies kombëtare. Nëse këto ritme vazhdojnë për 16 vite nuk mund të thuhet se kush do jetë më në këtë vend. Ky është një kushtrim për çdo shqiptar. Është një kushtrim për çdo intelektual, mësues, mjek, inxhinier, jurist dhe të gjitha profesioneve”, theksoi Berisha.
“Të mos harrojnë se thelbi i tij është mbrojtja e interesit publik. Ai është intelektual dhe ka për mision, sigurisht profesioni është profesion, por thelbi i tij qëndron në mbrojtjen e interesit publik. Nuk ka sëmundje më të tmerrshme për njeriun e librit, njeriun e dijes, për profesionistin, se sa konformizmi. E ka thënë Albert Ajnshtajni: ky rrezik është më i madh se rreziku nuklear për njeriun dhe njerëzimin. Ndaj dhe thirrja ime është për mësuesit, pedagogët, studentët; të ngrihemi, të bashkohemi për të rrëzuar këtë monizëm. Monizmi i sotëm në rrafshin e përqendrimit të pushteteve është absolutisht identik me monizmin e vitit 1990-91. Baza e monizmit ndryshon; ai kishte në bazë doktrinën ç’njerëzore marksiste leniniste, kurse ky ka në bazë horrorin e krimit, drogës dhe varfërimin e shqiptarëve”, shtoi ai.
Ish-kryeministri, gjatë takimit me mësues premtoi që kur PD të vijë në pushtet, ndryshimin e Shqipërisë do të fillojë pikërisht nga mësuesit me dyfishim të pagave dhe të buxhetit për arsimin.
“Ne do të dyfishojmë rrogat e mësuesve, do të dyfishojmë buxhetin për arsimin. Do bëjmë gjithçka që shkollat të marrin funksionin e tyre. Universitet janë bërë një objektiv sulmi ndaj një njeriu që për injorancën e tij totale mburret se unë nuk kam as gratë as titull, duke treguar me këtë se cili është koncepti i tij për djersën e derdhur, për lartësimin, për djersën e derdhur për kërkimin shkencor, për djersën e derdhur në hulumtime dhe publikime. Shfrytëzoj këtë rast për t’iu drejtuar të gjithë mësuesve, të angazhohen me fuqinë dhe mundësinë e tyre, të bëhen promotorë të ndryshimit që presin shqiptarët dhe Shqipëria, të ndryshimit jetik për të ndaluar këtë rrokullisje të madhe. Në 9 vite kemi humbur 1/3 e materies kombëtare, nëse këto rritmë vazhdojnë për 16 vite nuk mund të thuhet se kush do jetë më në këtë vend. Ky është një kushtrim për cdo shqiptar, për cdo intelektual, për cdo mësues, mjekë inxhinierë e juriste. Të mos harrojnë se thelbi i tij është mbrojtja e interesit publik. Të ngrihemi të bashkohemi për të përmbysur këtë monizëm”, tha kryeopozitari.
Në fjalën e tij para mësuesve, Berisha deklaroi se Edi Rama e shndërroi arsimin në një sistem të përçmuar.
Sipas tij, mësuesit dhe punonjësit e administratës janë kthyer në skllevër që detyrohen të shprehin pëlqimet për një organizatë kriminale, që siç tha Berisha “quhet qeveri shqiptare”.
Kryetari i PD, Sali Berisha u shpreh se në 9 vite janë mbyllur 760 shkolla në vend. Ai shtoi se është reduktuar në mënyrë të frikshme numri i nxënësve për shkak të shpopullimit që ka ardhur si pasojë e keqqeverisjes. Kryeopozitari deklaroi se qeveria ka vendosur në piedestal injorancën.
