Autori i masakrës së 1 marsit në Tiranë, Dan Hutra, i cili ekzekutoi me kallashnikov tre gra dhe la të plagosura tre të tjera, duket se ka gjetur një ambient armiqësor pas hekurave, pasi të dënuarit e tjerë nuk e pranojnë në qelitë e tyre.
Gazetari i kronikës, Eni Ferhati ka zbuluar detaje në lidhje me jetën në burg të Hutrës, duke nënvizuar se ai nuk është pranuar as nga të burgosurit në rrethin e tyre, pasi ka thyer kodet dhe rregullat etike, duke vrarë në mënyrë makabre tre gra.
Hutra mësohet se është lënën në një qeli i vetëm, kjo dhe për faktin se të dënuarit e tjerë në burgun 302 në kryeqytet kanë mllef për vrasjet që ai kreu, por edhe sepse i druhen përplasjeve fizike me të.
Kjo pasi vetë Hutra pranoi se në burgun e Drenovës është konfliktuar me Vladimir Kurtin (i dënuar me burgim të përjetshëm), të cilit për shkak të zënkës brenda hekurave i vrau motrën 31-vjeçare në banesën e familjes, në Kamës.
“Mund t’iu konfirmoj faktin se për Dan Hutrën ka pasur dhe një situatë në sistemin penitenciar. Edhe në burgje ka disa kode dhe rregulla të cilat nuk mund të shkelen. Askush nuk ka pranuar për të qëndruar në qeli me Dan Hutrën. Edhe për shkak të rrezikut që mund t’i kanoset, nga ky mllef i të burgosurve të tjerë ndaj tij, ai po trajtohet në mënyrë preferenciale. Duke u vendosur në një qeli më vete dhe duke u trajtuar ndryshe nga të paraburgosurit e tjerë. Nuk e duan as në burg, pasi ka thyer kodet dhe rregullat duke vrarë gra dhe duke kryer krime makabre”, zbuloi gazetari Ferhati.
Ai gjithashtu tha se “killeri” 40-vjeçar është braktisur nga familja e tij dhe pritet dënimi me burgim të përjetshëm, por që Hutra nuk ka ndërmend ta kundërshtoj pasi siç ai vetë tha edhe 5 dënime të tilla po të merrte, nuk do të pendohej për krimet që kreu duke terrorizuar Tiranën.
“Është abandonuar nga familjarët e tij, kjo u pa gjatë seancës për masën e sigurisë, ku familjarët nuk i gjetën as edhe një avokat, por që iu caktua nga shteti. Për Dan Hutrën sigurisht, pritet dënimi me burgim të përjetshëm. Nga dëshmitë e familjarëve që unë kam takuar më kanë pohuar se ka patur kriza nervore që në moshë të hershme, si dhe ka qenë përdorues i lëndëve narkotike që në moshë të vogël”, tha gazetari.
