Detaje të reja kanë dalë në dritë për ngjarjen e rëndë që ndodhi mbrëmjen e djeshme në Çarshinë e Shkupit, në Maqedoninë e Veriut, ku rreth orës 20:10 persona të maskuar realizuan një sulm me armë në një lokal “Shisha Bar”, duke ekzekutuar në vend shqiptarët Jeton Krivanjeva dhe Enes Iseni.
Përveç dy personave që ishin objektiv i një atentati është plagosur edhe kamarieri, i identifikuar si shqiptari Tahla Ali.
“Më 06.03.2023 në ora 20:11 në SPB-Shkup është denoncuar se në një objekt hotelierik në Shkup disa persona kanë shtënë me armë ndaj J.K. dhe E.I. të cilët kanë nderuar jetë në vendngjarje si dhe ndaj A.T. i cili ka marrë lëndime dhe është dërguar në spital për t’i dhënë ndihmën mjekësore. Po merren masa për zbardhjen e rastit”, thuhet në njoftimin e Ministrisë së Brendshme të RMV-së.
Sipas informacioneve të para, vrasësit janë prezantuar si policë dhe kanë thënë se po bëjnë kontroll në bar kafenë. Pasi kanë gjetur tavolinë e personave për për të cilët kishin ardhur, kanë hapur zjarr të shpejtë dhe i kanë vrarë dy shqiptarët.
Pas vrasjes është gjetur e djegur në afërsi të unazës së Shkupit makina tip “Audi 6”, me të cilën katër ekzekutorët e vrasjes së dyfishtë kishin ardhur në vendngjarje, ndërsa ata janë zhdukur në drejtim të panjohur nga një lagje në afërsi të vendit të vrasjes.
Targat e makinës sipas gazetës “KOHA” ishin targa të falsifikuara. Vrasësit kanë pasur bashkëpunëtorë tjerë, të cilët i kanë ndihmuar të arratisen pasi e kanë djegur mjetin.
Policia dhe prokuroria kanë nisur hetimin duke mbledhur provat e nevojshme nga vendngjarja.
