Mette Frederiksen, kryeministrja e Danimarkës po zhvillon një vizitë zyrtare në Tiranë. Pas takimit me kryeministrin Edi Rama, kanë dhënë një konferencë për shtyp.
Frederiksen tha se e vlerëson partneritetin me vendin tonë dhe shpreson në forcimin e bashkëpunimit.
“Të gjithë duhet të jemi të vetëdijshëm për situatën shumë të brishtë të vendeve të Ballkanit Perëndimor. Mendoj se përkushtimi juaj ndaj vlerave evropiane është i rëndësishëm dhe po kështu kjo është pjesë mjaft e fortë e çeljes së negociatave për anëtarësimin e Shqipërisë në BE. E di që është një punë mjaft e madhe dhe kërkon shumë zgjidhje, shumë reforma, por unë e di që ju keni kapacitetin për ta bërë këtë dhe ne ju mbështesim fort në rrugëtimin dhe drejtimin tuaj”– tha Frederiksen.
Më tej, kryeministrja daneze theksoi se do të rrisin bashkëpunimin edhe për rikuperimin nga pasojat që lufta në Ukrainë ka lënë në Shqipëri.
Kryeministri Rama tha se Danimarka ka qenë një mbështetëse e vendosur e Shqipërisë dhe Ballkanit Perëndimor në procesin e integrimit.
“Mes nesh Shqipërisë dhe Danimarkës ka një histori marrëdhëniesh diplomatike shumë të mira. Danimarka ka qenë prezente në të gjithë procesin e transformimit të vendit, qoftë përmes agjencisë së saj të ndihmës, por mbi të gjitha politikisht dhe diplomatikisht një mbështetëse e vendosur e Shqipërisë dhe Ballkanit Perëndimor në procesin e integrimit europian”, tha Rama.
Sipas Ramës, “vizita e kryeministres këtu ka një rëndësi të veçantë edhe për marrëdhëniet gjeopolitike mes Europës së bashkuar dhe Ballkanit Perëndimor dhe vetë Danimarkës me Ballkanin Perëndimor.
