Tragjedia e ndodhur në Larisa të Greqisë, ku nga përplasja e një treni mallrash dhe një treni që transportonte pasagjerë nga Athina për në Selanik, ku humbën jetën 57 persona (mes tyre dhe 6 shqiptarë) ka vendosur me shpatulla pas muri kryeministrin Kyriakos Mitsotakis.
Teksa ditën e djeshme u kërkoi falje publike familjeve të viktimave teksa mijëra protestues u mblodhën në Athinë dhe u përleshën me policinë, këtë të hënë Mitsotakis ka ndërmarrë një tjetër hap për të treguar se qeveria është serioze në qëndrimin e saj për të zbardhur të vërtetën dhe dënuar përgjegjësit.
“Si kryeministër, ua kam borxh të gjithëve, veçmas familjarëve të viktimave që t’iu kërkoj falje. Për Greqinë e vitit 2023, dy trena që udhëtojnë në drejtime të ndryshme nuk mund të lëvizin në shinë të njëjtë dhe askush të mos e vërejë”, tha dje kryeministri helen.
Sakaq, sot Mitsotakis i ka dërguar një letër prokurorit të Gjykatës së Lartë, Isidoros Dogiakos, në të cilën kërkon që hetimit gjyqësor për përplasjen e trenit në Tempi t’i jepet përparësi absolute dhe niveli hetimor të jetë në masën më të lartë të mundshme.
Kryeministri i vë në dukje Dogiakos gjithashtu për vlerësimin penal të gabimeve në sektorin hekurudhor “përfshi edhe vonesën e mundshme në përfundimin e përmirësimit të kërkuar teknologjik të infrastrukturës përkatëse” për të vijuar “pavarësisht progresit të komisionit të ekspertëve që është caktuar”.
“I nderuar zoti prokuror,
Siç e kuptojmë të gjithë, është një kërkesë e arsyeshme dhe e drejtë e shoqërisë greke për një zbardhje të menjëhershme dhe të thelluar të të gjitha çështjeve penale që lidhen me aksidentin tragjik të trenit. në Tempi. Për këtë, ju kërkoj që në emër të Qeverisë Greke të prioritizoni çështjet përkatëse dhe t’i caktoni ato, nëse e konsideroni në nivelin më të lartë hetimor.
Në veçanti në lidhje me vlerësimin penal të gabimeve sistematike në sektorin hekurudhor, duke përfshirë çdo vonesë në përfundimin e përmirësimit të kërkuar teknologjik të infrastrukturës përkatëse, ju lutemi të vazhdoni pavarësisht nga ecuria e punës së komisionit të ekspertëve të caktuar për të kryer vlerësimin e tyre nga pikëpamja administrative dhe teknike.
Pas përfundimit të punës së komisionit, gjetjet e tij natyrisht do t’u komunikohen organeve të ndjekjes hetimore për t’u bërë pjesë e dosjes”, shkruan Mistotakis.
