Nga Boldnews.al
Kryetarja e Bashkisë së Durrësit, Emiriana Sako, ka “thyer” një rekord në tenderët publikë. Në një procedurë, kryetarja e zgjedhur pa zgjedhje ka s’kualifikuar 6 nga 7 firmat në garë, duke ia “falur” lekët firmës “Gjikuria”. Kjo e fundit njihet për tenderët në zonën e Jugut të Shqipërisë, ku ka fituar me dhjetëra procedura nga Fondi Shqiptar i Zhvillimit dhe Bashkia Himarë.
Ndërkohë, duke u bazuar në procedurën e Sakos vihet re se oferta e “Gjikurisë” ka qenë më e lartë. Skema e përdorur ka qenë e paramenduar, pasi janë “groposur” ata që ofruan më pak për ta shpallur fituese. Diferenca nga oferta më e ulët deri te më e larta është plot 170 mijë euro, para’ të cilat në këtë kohë para zgjedhjeve iu gjendet vendi kollaj.
E gjitha vjen në një kohë para zgjedhore, ku pritet të bëhen “nderet e fundit”. Frika nga mos kandidimi apo edhe nga zgjedhjet, në rast se kandidon, ka sjellë këto lëvizje, duke dhënë para firmave të preferuara.
BoldNews.al shfletoi dokumentet e këtij tenderi, i cili ka pasur një objekt “rikonstruksioni i Qendrës Kulturore të Fëmijëve, Durrës”. Fondi i dhënë nga Sako është 106.262.235 lekë pa TVSH, ndërkohë që ky rikonstruksion do të bëhet brenda 120 ditëve.
Sipas dokumentit të mësipërm, në këtë procedurë morën pjesë 7 kompani, të cilat dhanë ofertë (e 8-ta s’kishte ofertë ekonomike). Bashkimi i Operatorëve Ekonomikë “ASI-2A CO”, “SHENDELLI” dhe “JODY-KOMPANY” ofruan 86.046.103 lekë pa TVSH. Oferta e dytë ishte e firmës “T&XH” me vlerë 87.878.225 lekë, e kështu me radhë për të shkuar te oferta e renditur e shtata, ajo që ka pasur ofertën më të lartë.
Në dokument saktësohet se firma e 7-të, është “”GJIKURIA” e cila kishte një ofertë 103.989.213 lekë pa TVSH, ose mbi 1 milionë euro me TVSH. Kjo ofertë, më e larta, u shpall çuditërisht edhe fituese nga Emiriana Sako.
Por si e arriti?! Natyrisht duke s’kualifikuar jo 1 po 6 firmat që ofruan më pak. Oferta më e ulët, ajo e bashkimit të 3 operatorëve pasi s’kanë punë të ngjashme. Gjithashtu edhe me arsyet se s’kanë punonjës të specializuar apo të kualifikuar. Firma e dytë u s’kualifikua për arsye se s’ka staf mbështetës. Ndërkohë, e treta se s’kishte staf dhe fuqi punëtore. E katërta se s’ka subjekt mbështetës, s’ka kapacitete dhe 1 licencë.
Arsyet e s’kualifikimit vijojnë edhe për firmën e pestë, e cila ka shkruar në dokumente se do të përdorë stafin e një firme tjetër, por në letra nuk lejohet kjo gjë! Firma e gjashtë u s’kualifikua sërish se s’ka inxhinier elektronik apo edhe punëtorë ndërtimi të thjeshtë. Dhe të gjitha këto kushte i përmbushte vetëm “Gjikuria”, e cila megjithëse u rendit e shtata, fitoi tenderin prej 1 milionë eurosh.
