Në fjalën e tij për mediat vetëm pak minuta pasi Gjykata e Apelit të Tiranës rrëzoi vendimin e gjykatësit Agron Zhuka dhe dërgoi për rigjykim në Gjykatën e Shkallës së Parë ështjen e “Vulës” së Partisë Demokratike, Sali Berisha zbuloi edhe hapat që do të ndjekë në vijim.
Njëjtë si deputeti Oerd Bylykbashi, i cili tha se do të mblidhen organet kolegjiale të PD për të vendosur, Berisha theksoi se është koha që të gjitha forumet të përgatiten për misionin e shpëtimit të pluralizmit.
“Ky vendim vjen në një kohë kur opozita është e angazhuar në një revolucion demokratik, paqësor, me të cilin ajo është e betuar të përmbysë monizmin e Edi Ramës, është e betuar të ju rikthejë shqiptarëve votën e lirë. Në këtë kontekst unë i bëj thirrje anëtarëve dhe simpatizantë të PD-së të ngrihen në lartësinë e tyre të misionit historik, misionit të shpëtimi të pluralizmit, demokracisë, të shoqërisë shqiptare dhe Shqipërisë”, tha Berisha.
Ndër të tjera kreu i PD shtoi se shqiptarët sot në shumë se kurrë presin nga guximi dhe qëndrimi i demokratëve në realizimin e këtij misioni.
“Kam besim se sic kapërcyem me mënyrën më të vendosur e legjitime të gjitha kurthet e përpjekjet për agjësimin tonë, do kapërcejmë cdo pengesë. Opozita është mision i lartë moral. Të mendosh të diktosh me 3 gjykatës që i detyron të lexojnë një vendim të përgatitur në zyrat tuaj, të bën të jesh njëlloj si babai e daja jot biologjik, xhelat i lirisë dhe meriton cdo ndëshkim. PD është sot një parti më e fuqishme se kurrë. Do mbledh formumet këto ditë mbi bazën e këtij qëndrimi armiqësor asgjësues të shpallur nga narkoshteti e do marrë vednimet e duhura për të vijuar misionin në mënyrën më të fuqishme”, deklaroi ai.
