Deputeti dhe nënkryetari i PD-së, Oerd Bylykbashi, duke folur në emisionin “Të Paekspozuarit” për gjyqin e nesërm në Gjykatën e Apelit për “vulën” e PD-së tha se personi i caktuar nga Lulzim Basha, Enkelejd Alibeaj, nuk ka legjitimitet për padinë e bërë. Ai tha vetëm fakti se kjo çështje është shtyrë kaq kohë tregon presionin e madh ndaj gjyqtarëve për këtë çështje.
“Gjyqtari e ka marrë kërkesën e Alibeajt dhe i ka thënë se nuk ke të drejtë ta ngresh, sepse nuk je palë në proces. Pra ai nuk ka qenë palë dhe nuk mund të bëjë kërkesë. Në një çështje të tillë që është politike brenda një partie, nuk ka gjykim. Para vitit 2000 kur iu kalua gjykatës, këto gjëra i bënte ministri i drejtësisë, por ia hoqën për konflikt interesi si njeri politik.
Ligji i partive politike, bazuar mbi kushtetutën e përcakton fare qartë: Partia është bashkim vullnetar individësh, nuk është kryetari që bën partinë. Në statutin tonë thuhet se Kuvendi shkarkon kryetarin. Basha të thotë çfarë të dojë, të bëjë edhe padi, por ta bëjë në shkallë të parë, jo në Apel. Alibeaj nuk legjitimohet për atë çështje nesër.
Nëse ka një presion që i është bërë sistemit të drejtësisë në këtë periudhë është pikërisht kjo dhe këtë e ka Rama, por ai që i shëerben Ramës i bën dëm PD-së.
Vetëm fakti që është shtyrë kaq kohë çështja tregon presionin e madh ndaj kësaj çështjeje”-tha Bylykbashi.
