Endja e lirë në rrugët e Tiranës e një personi me rrezikshmëri të lartë si Dan Hutra, i cili i mori jetën tre grave dhe la të plagosura tre të tjera këtë të mërkurë, ka mjaftuar që Inspektori i Lartë i Drejtësisë të nisë verifikimet për vendimet e Gjyqësorit në favor të 40-vjeçarit.
ILD ka reaguar pas 3 vrasjeve që tronditën kryeqytetin, por edhe pas dyshimeve që lindën mbi mënyrën sesi hutra ka lënë qelinë më 16 shkurt të këtij viti, kur vetëm dy ditë më parë në 14 shkurt Gjykata e Apelit të Tiranës ka refuzuar kërkesën e tij për zbutje të masës së sigurisë në “Detyrim paraqitje”, pasi ishte dënuar për “Dhunë në familje”.
Përmes një njoftimi, ILD-ja shprehet se ka urdhëruar nisjen e verifikimit të rastit për të identifikuar, nëse ka, përgjegjësi disiplinore nga ana e magjistratëve.
“Inspektori i lartë i Drejtësisë po ndjek me vëmendje komunikimet në media mbi ngjarjen tejet të rëndë të ndodhur sot në Tiranë, ku tre grave iu mor jeta dhe tre të tjera u plagosën, nga një individ i dënuar më parë për vrasje.
Sic ka vepruar edhe në raste të tjera të ngjashme me ndjeshmëri të lartë publike, Inspektori i Lartë i Drejtësisë bën të ditur, se ka urdhëruar nisjen e verifikimit të rastit për të identifikuar, nëse ka, përgjegjësi disiplinore nga ana e magjistratëve”, thuhet në njoftimin e ILD-së.
