Para se të kryente masakrën në Paskuqan në orën 12:30, ku la pas dy viktimave dhe dy të plagosura, teksa shkoi në shtëpinë e familjes Hysa për të ekzekutuar ish-bashkëjetuesen e tij, 40-vjeçari Dan Hutra është bërë protagonist i një tjetër ngjarjeje të rëndë.
Nga burime mësohet se Hutra, i cili vijon të jetë në arrati ka plagosur një qytetare në një dyqan në zonën e Astirit, e cila dyshohet të jetë e dashura e tij, pasi më parë i kishte kërkuar para duke e kërcënuar.
Mësohet se 40-vjeçari i rrezikshëm i ka kërkuar lekë punonjëses 40-vjecare me iniciale M.G. dhe e ka qëlluar me thikë në bark duke e lënë të plagosur.
“Më datë 01.03.2023, rreth orës 12:15, është paraqitur për të marrë ndihmë mjekësore në spital, shtetasja M. G., 40 vjeçe, e dëmtuar me mjet prerës, e cila ndodhet jashtë rrezikut për jetën. Dyshohet se kjo shtetase është dëmtuar me mjet prerës, në zonën e quajtur “Astiri”, thuhet në njoftimin e policisë.
Policia ka marrë dëshmi nga pronari i biznesit, ndërkohë që punonjësja e plagosur është transportuar me urgjencë për në spital për t’u trajtuar me ndihmë mjekësore.
Ndërkohë, 40-vjeçari mbetet ende në arrati edhe pse Policia e Shtetit është mobilizuar për të bërë të mundur arrestimin e tij. Ai qarkullon me një automjet tip ‘Benz C-class’ me targa ‘AA 531 UK’ dhe cilësohet tepër i rrezikshëm pasi ka në posedim një armë kallashnikov, të cilën kreu edhe masakrën në familjen Hysa.
Dan Hutra vrau me armë zjarri Mevlute Hysën 30 vjeçe, (motra e ish-bashkëjetueses së tij) dhe Hasime Dafku 30 vjeçe, (e fejuara e vëllait të ish-bashkëjetueses) si dhe plagosi Elena Hysën dhe Kujtime Hysën.
Dan Hutra është një personazh me të shkuar të kriminale. Në 2007 ai është dënuar pasi ka vrarë me armë zjarri ish-gruan Dafina Havalja, të cilën e kishte vrarë me dy goditje thike në zemër e mëlçi.
Në vitin 2003, Hutra mori peng nënën dhe kunatën, dhe përdhunoi kunatën tjetër.
Në 2014 në qelinë ku vuante burgun në Drenove kishte futur disa sharra hekuri.
Dan Hutra, autor i masakrës, ishte arrestuar në qershor të vitit 2021 për dhunë në familje, por ishte lënë i lirë më 16 shkurt 2023.
