Katër persona janë arrestuar nga policia e Fierit, që ka sekuestruar 2 lokale dhe një hotel. Ambientet, sipas bluve, përdoreshin për ushtrim të prostitucionit.
Të implikuar në këtë veprimtari konsiderohen edhe 8 persona të tjerë, të cilët u proceduan penalisht.
Arrestimet
Hetimi disa mujor u krye nga seksioni për Hetimin e Trafiqeve të Paligjshme të Drejtorisë Vendore të Policisë Fier, në bashkëpunim me Prokurorinë e Fierit, të mbështetur nga inteligjenca informative, njoftoi policia. Sipas të njëjtave burime, janë siguruar prova për disa ambiente të vëna në dispozicion të ushtrimit të veprimtarisë së kundërligjshme të prostitucionit.
Gjykata e Rrethit Gjyqësor Fier caktoi masën e sigurisë “Arrest në burg”, për 4 persona që sipas hetimeve, kishin në administrim lokale dhe hotele të vëna në dispozicion për ushtrim të prostitucionit.
Pas caktimit të këtyre masave, efektivët organizuan dhe finalizuan operacionin policor të koduar “Bazat”.
Si rezultat i këtij operacioni, u ekzekutua masa e sigurisë “Arrest në burg”, për veprat penale “Mbajtja e lokaleve për prostitucion” dhe “Shfrytëzimi i prostitucionit”, për 4 persona, banues në Fier:
- Nesti Golemaj, 69 vjeç dhe Besiko Molishtari, 71 vjeçe, pronarë të një lokali në lagjen “Kastriot”;
- Nexhie Aliaj, 63 vjeçe, pronare e një lokali në lagjen “Kastriot”;
- Tajar Hysenaj, 69 vjeç, pronar i një hoteli në lagjen “16 prilli”.
Hetimet
Sipas hetimeve, këta katër persona, në bashkëpunim me njëri-tjetrin, gjatë periudhës maj 2022-shkurt 2023, kishin vënë 2 lokalet dhe hotelin që kishin në pronësi, në dispozicion të ushtrimit të veprimtarisë së kundërligjshme të prostitucionit.
Gjithashtu, për këtë rast u referuan materialet në Prokurori, ku nisi procedimi në gjendje të lirë për 8 persona, të dyshuar të implikuar në këtë veprimtari.
“Vijon puna për identifikimin dhe nxjerrjen përpara përgjegjësisë penale, të shtetasve të tjerë të implikuar në këtë rast”, ndërsa “materialet procedurale i kaluan Prokurorisë pranë Gjykatës së Shkallës së Parë Fier, për veprime të mëtejshme”, mbyllet njoftimi i policisë.
