Përveç kryeministrit Edi Rama, duket se Charles McGonigal ka pasur një listë të gjatë miqsh të radhët e Partisë Socialiste…
Miku tjetër i McGonigal – etiketim ky i shprehur nga vetë pena e ish-shefit të FBI-së, sipas disa mail-eve të publikuara nga grupi “Homeland “Justice”, rezulton Fatmir Xhafaj.
Gjiknuri dhe Balla
Pas një foto të publikuar mes tij dhe Mcgonigal, Damian Gjiknuri u detyrua të pranojë publikisht se është takuar me ish-zyrtarin e FBI-së nën akuzë nga autoritetet amerikane.
Fotografia në fjalë i përket periudhës Shtator 2021, kur Mcgonigal mori medaljen “Mirënjohja e Tropojës”. Në ceremoni, siç ka zbuluar asokohe kryebashkiaku i Tropojës Rexh Byberi, përmes një postimi në rrjetet sociale, ishte prezent edhe Damian Gjiknuri, si dhe Agron Neza – personi A në dosjen amerikane të Uashingtonit në ngarkim të Mcgonigal.
“E kam takuar disa herë”, do të deklaronte më vonë për mediat Gjiknuri, sekretar i përgjithshëm i Partisë Socialiste.
Përveç tij, edhe Taulant Balla do të pohonte takimet me McGonigal.
“Edhe unë e kam takuar ku kemi ndarë dhe diskutuar në funksion të marrëdhënieve të shkëlqyera të marrëdhënieve mes SHBA-së dhe Shqipërisë. Askush nuk do i thoshte jo një takimi të tillë në cilësinë e atij pozicioni zyrtar, kanë qenë takime të formës së bashkëpunimit gjatë kohës që ka qenë në detyrë, pas kësaj kohe që nuk ka qenë në detyrë nuk e kam takuar…”, do të shprehej Balla në një prononcim për gazetarët në muajin Janar.
McGonigal – Xhafajt: Miku im, mezi pres të takoj
Së fundmi, zbulohet se edhe deputeti socialist Fatmir Xhafaj, ish-ministër i Brendshëm dhe ish-kryetar i komisionit të posaçëm për reformën në drejtësi, ka pasur lidhje me ish-agjentin e FBI-së.
“Homeland Justice” – grupi që ka marrë përsipër autorësinë e dy sulmeve kibernetike ndaj faqeve online të institucioneve shtetërore – publikoi një ditë më parë një dokument voluminoze. Sipas publikuesve, bëhet fjalë për mail-e që janë hakeruar nga posta elektronike e disa zyrtarëve të lartë, mes tyre deputetë të Kuvendit të Shqipërisë.
Në listën me 10 emra ishte dhe ai i Fatmir Xhafajt.
Ky i fundit, referuar asaj ç’ka ka publikuar “Homeland Justice”, në vitin 2021 i ka dërguar një e-mail urimi për festat e fundvitit ish-shefit të kundërzbulimit të FBI-së në Nju Jork.
Në tekstin e letrës shkruhet:
I dashur Zoti Mcgonigal.
Shpresoj që ky e-mail të të gjejë mirë.
Me rastin e afrimin e festave të fundvitit, do të dëshiroja të uroja Gëzuar Krishtlindjet dhe Vitin e Ri.
Qoftë një vit plot shëndet, sukses, dhe prosperitet për familjen tuaj!
Në përgjigje, Charles Mcgonigal e falënderon për urimin dhe e quan “miku im”.
Po ashtu, shton se mezi pret ta takojë së shpejti.
“Fatmir, Miku Im,
Faleminderit për urimet! Të uroj ty dhe familjen tënde më të mirat për një sezon pushimesh të qetë dhe të begatë.
Gjithë të mirat dhe mezi pres t’ju takoj së shpejti.
Më të mirat, Charlie,” thuhet në e-mail.
