Ish-ministri dhe deputeti demokrat, Genc Pollo ka folur në lidhje me çështjen e ish-agjentit të FBI-së McGonigal dhe lidhjet e tij me Shqipërinë dhe kryeministrin Rama, në rubrikën “Opinion” në News24.
Pollo deklaroi se ajo që ka ndodhur me McGonigal është jashtë imagjinatës amerikane dhe është e tmerrshme për ta, ndërsa shtoi se autoritetet në SHBA janë të interesuara që të mos zbulohen të gjitha detajet për çështje imazhi.
Sipas tij fakti që Rama heshti dhe më pas doli në mënyrë të kontrolluar tregon se “Rama është në hall të madh”, teksa vijoi duke thënë se “ka përgjegjësi individuale” si me rastet e ish-ministrave Tahiri dhe Koka.
“Për pasojat në Shqipëri ajo që ka ndodhur me McGonigal është jashtë imagjinatës amerikane dhe është e tmerrshme për ta. Ata janë të interesuar që të mos zbulohen të gjitha tani për çështje imazhi. Nuk kemi të bëjmë më rekrutime nga spiunazhi armik siç ka ndodhur shumë vite më parë. Ka pasur raste abuzimi apo korrupsioni, por për herë të parë drejtori i FBI-së shkon në një vend aleat duke ndikuar në politikë e duke u marrë para oligarkëve. Analistë shumë të mprehtë e konsiderojnë këtë një histori të tmerrshme me sa kanë marrë vesh, që dinë se është përdorur për ndikimin te opozita dhe marrja e tenderave të oligarkët që Rama i jep me dorën e vet dhe i merr me dorën e McGonigalit.
Fakti që Rama heshti dhe më pas doli në mënyrë të kontrolluar tregon se Rama është në hall të madh. Ai nuk flet dot tani duke thënë “ka përgjegjësi individuale”, i doli Tahiri tha është ashtu, i doli Koka dhe e njëjta gjë. Në këtë rast nuk ka asnjë nga këta dhe është vetëm Edi Rama. Sikur një kryeministri të BE-së t’i dilte emri në aktakuzë do ikte për 24 orë, në Shqipëri kjo nuk ndodh. Është ai i gjithi i përfshirë që ka sjellë dëme politike në vend dhe Amerikës i ka bërë një turpërim publik të madh me rekrutimin e McGonigal. Është pajtuar si të jetë detektiv privat e u ka zhvatur para të tjerë personave.
Një komision hetimor do ndihmonte në zbardhjen e çështjes. SPAK është i paralizuar. Rama dhe Kim nuk kanë interes që kjo çështje të zbardhet dhe prandaj SPAK-un e mendoj të paralizuar. Kim nuk ka interes për të njëjtën arsye që nuk donte FBI-ja që t’i dilnin lakrat kaq shpejtë sepse dëmtohet imazhi. Më vonë do zbulohet, por jo tani që është e nxehtë. Kim ka bërë qesharak personin e saj dhe shumë gjëra të bëjnë të mendosh që nuk do të reagojë. Sjelljet e saj kanë qenë anormale dhe përdorimi i McGonigal ndaj opozitës ka qenë në të njëjtën linjë. Janë një sërë indiciesh që të bëjnë të mendosh për këtë.
SPAK-un e shoh më të paralizuar se në rastin e inceneratorëve. Në këtë rast ku nuk hetohet dot Rama sepse nuk ka asnjë ministër apo deputet të përfshirë për t’ia lënë në derë. SPAK nuk guxon, prandaj duhet komisioni hetimor.
Mocioni me debat do jetë me akuza e shfajësime. Akuzat e provat dihen, por ato provohen nga komisioni dhe prandaj Rama nuk e do sepse aty duhet të japë përgjigje që kanë vlerën e provës. Një komision hetimor për këtë çështje është më i rëndësishëm se rasti i inceneratorëve që në fund të fundit është vjedhje, ndërsa këtu rrezikohet demokracia”, tha ai.
