Kryebashkiaku Bardh Spahia thotë se Shkodra është gati për protestën e 3 marsit në Tiranë, e thirrur nga kreu i Partisë Demokratike, Sali Berisha.
Gjatë një reagimi në rrjetet sociale, Spahia shkrua se skandalet e njëpasnjëshme qeveritare kanë thelluar krizat, rritur varfërinë dhe shtuar ikjet e shqiptarëve, dhe sipas tij, është koha për t’i thënë ndal.
Postimi i plotë i Bardh Spahisë:
“Shkodra është gati për protestën e madhe të 3 Marsit në kryeqytet.
Organizimi qytetar ashtu si edhe ai politik është mbreslënës, duke dëshmuar edhe njëherë tjetër se qytetarët e duan me ngulm ndryshimin. Me strukturat drejtuese dhe anëtarët e Grupseksionit 3/3 të Partisë Demokratike analizuam gjendjen në të cilën ndodhet sot kryeqendra e veriut dhe e gjithë Shqipëria.
Pseudo-reformat, diskriminimi politik i Shkodrës dhe veriut në tërësi, skandalet e njëpasnjëshme qeveritare kanë thelluar krizat, rritur varfërinë dhe shtuar ikjet e shqiptarëve. Koha është për t’i thënë ndal, prandaj të gjithë të bëhemi bashkë në 3 Mars, në protestën e madhe që qytetarët do të kenë kundër regjimit të Edi Ramës.
Mirënjohje çdo qytetari dhe demokrati shkodran që nuk dorëzohen përballë asgjëje.”, shkruan Spahia.
