Katër anije minakërkuese të NATO-s kanë kryer një kontroll në zonën detare ku do të ngrihet porti i ri i Durrësit dhe baza detare e NATO-s.
Pasi kanë kryer stërvitjen në ujërat e Mesdheut dhe kontrollin në ujërat e Spitallë- Porto Romanos, anijet minakërkuese janë ankoruar në portin detar të Durrësit.
Në ujërat e Porto Romanos përveç kontrollit me pajisje të teknologjisë së lartë ushtarake janë përdorur dhe polumbarët e flotës.
Burime mediatike bëjnë me dije se nga kontrolli i ushtruar, veçanërisht në dy pika që konsideroheshin me risk, zona ka rezultuar e pastër. Pritet që një raport i plotë me gjetjet t’i dorëzohet autoriteteve shqiptare.
Anijet luftarake të angazhuara prej më shumë se një muaji në stërvitjen në Mesdhe dhe në kontrollin e hapësirës detare ku do të ndërtohet porti dhe baza detare e NATO-s janë “TCG YZB Gungor Dormus (A274) dhe “TCG ENEZ” (M 262), të dyja me flamur turk, si dhe ITS NUMANA (M5457) me flamur italian dhe “HNLMS MAKKUM” (857) me flamur hollandez.
Ato do të qëndrojnë për disa ditë, duke shkëmbyer eksperiencë me Forcën tonë detare dhe repartet zjarrfikëse te Portit te Durrësit.
Flotilja përbëhet nga anija komandë dhe 3 anije shoqëruese.
Anijet do të largohen më 27 shkurt.
