Deputeti demokrat, Oerd Bylykbashi reagoi pasi Byroja e Kuvendit mori një vendim të shpejtë për të lënë në fuqi përjashtimin e deputetëve demokratë.
Në një deklaratë për mediat, ai tha se Garda u urdhërua të ushtronte dhunë fizike ndaj deputetëve duke i ndaluar të futeshin në Parlament.
“Me një vendim fashist maxhoranca e Ramës përjashtoi deputetët e Kuvendit nga pjesëmarrja në seancë dhe komisione. Kjo është në vazhdën e përjashtimeve të 3 seancave të fundit ku mbi 20 deputetë janë përjashtuar se kërkojnë një të drejtë kushtetuese, kontrollin e qeverisë. Kemi kërkuar ngritjen e një komisioni hetimor për të hetuar skandalin më të paprecedentë, ku kryeministri përmes korruptimit të McGonigal synoi të shkatërronte demokracinë duke goditur opozitën”, tha fillimisht Bylykbashi.
“Mblodhën Byronë dhe morën një vendim të formës së prerë pa dëgjuar deputetët. Është shkelje brutale e Kushtetutës. Parlamenti i Shqipërisë përsëri përjashtoi deputetë të parlamentit. Kjo është në vazhdën e përjashtimeve të seancave të fundit, kur mbi 20 deputetë janë përjashtuar vetëm pse kërkojnë një të drejtë kushtetuese në emër të shqiptarëve. Këtë opozita e bën me komisione hetimore, me mocione me debat. Kemi kërkuar ngritjen e një komisioni hetimor për skandalin më të paprecedent të historisë së Shqipërisë, ku kryeministri përmes korruptimit të McGonigal, synoi të shkatërronte demokracinë dhe opozitën në Shqipëri. Ne përfaqësojmë mbi 750 mijë zgjedhës. Kemi vendosur të mos ketë seanca normale pa u garantuar kjo e drejtë kushtetuese e shqiptarëve, jo e deputetëve,” tha Bylykbashi, duke akuzuar se Garda e Republikës ushtroi dhunë ndaj deputetëve demokratë.
Ka nisur me tension dita e sotme pasi deputetët e opozitës nuk janë lejuar të futen në Kuvend. Kujtojmë që prej disa javësh tashmë nuk zhvillohet një seancë normale, pasi jashtë Kuvendit protestojnë mbështetësit e Berishës, ndërsa brenda deputetët e opozitës të cilët bllokojnë foltoren dhe fishkëllejnë me bilbila, teksa kërkojnë që kryeministri Edi Rama të paraqitet në Kuvend për të dhënë “llogari” për implikimin e tij në aferën “McGonigal”. Berisha ka bërë të qartë që demokratët do të vijojnë aksionin opozitar brenda dhe jashtë parlamentit.
