Pas publikimit të rastit të një foshnjë 19 muajshe që u braktis nga nëna dhe babai e mbyllte me dry vetëm në një shtëpi-kasolle dhe shkonte në punë, ka ndërhyrë më në fund Shërbimi Social Shtetëror. Punonjës të këtij shërbimi kanë shkuar në fshatin Glloboçisht të Dibrës dhe pas negociatave me prindërit, e ka transportuar fëmijën në Tiranë, duke e marrë në mbrojtje.
Foshnja i është nënshtruar edhe një ekzaminimi mjekësor, nga ku ka rezultuar se fëmija ka probleme me shikimin për shkak se ka qëndruar për një kohë të gjatë në errësirë.
Bashkë me fëmijën ka udhëtuar drejt Tiranës edhe babai i saj, për ta shoqëruar në qendrën e përkujdesit Social.
Ndërkohë që punonjësit e SHSSH kanë komunikuar me nënën e saj, ajo është shprehur e gatshme ta marrë foshnjën me vete, por kjo gjë nuk do të jetë e mundur, pasi nëna nuk ka kushtet e përshtatshme financiare dhe sociale për ta mbajtur.
Gruaja bashkëjeton në Bulqizë me një burrë tjetër dhe me djalin e madh 6 vjeç të cilin e ka marrë me vete.
