Edi Ramën nuk e shqetëson aspak fakti që një ish-zyrtare e Kryeministrisë dhe këshilltare e Arben Ahmetajt në kohën kur drejtonte Ministrinë e Rindërtimit, ndodhet aktualisht pas hekurave pasi mbi 500 mijë euro të sajat u gjetën të fshehura në aspiratorin dhe shtëpinë e pastrueses së saj Rozeta Dobi.
Kur në ledëall-in e “Opinion” u shfaqën mijëra euro të gjetura nga policia në tubin e aspiratorit, Rama e shiti këtë si sukses të Policisë së Shtetit dhe jo provë të korrupsionit në administratë.
Edhe pse siç vet ai u shpreh “vjedhja ekziston padyshim në vend”, shefi i qeverisë tha se mburret me faktin që policia ka zbuluar një rast të tillë.
PJESË NGA BISEDA:
Ju nuk ndiheni keq si kryeministër i Republikës së Shqipërisë të shihni këtë pamje për shembull? Te një zyrtare e qeverisë shqiptare, shuka lekësh të mbledhur me qese dhe të futura në aspiratorin e sobës
Edi Rama: Të falenderoj për këtë. Unë natyrisht që nuk ndihem mirë dhe nuk kam sesi të ndihem mirë për asnjë gjë të tillë, për asnjërin. Por ama nga ana tjetër kjo çështje është një tjetër arsye që njerëzit të besojnë që ajo që unë po bëj dhe që ne po bëjmë është serioze. Pse? Këtë çështje e ka hapur Policia e Shtetit. Pra ka qenë Policia e Shtetit, e cila është vënë në dijeni të kësaj çështjeje, e cila e ka bërë publike këtë çështje. Pra kemi ardhur në një kohë të re në Shqipëri, kur Policia e Shtetit, drejtori i përgjithshëm, drejtori i Tiranës, shefat e policisë e ku di unë nuk marrin urdhra dhe nuk pyesin fare, orë shiko, është kapur filanja. Kjo është ish-zyrtare.
Kjo është ta shohësh gotën gjysmë bosh, ose gjysmë plot. Se ju nuk mund të mburreni që sot vjedhin dhe ne i kapim!
Edi Rama: Unë mburrem që ç’ke me atë punë. Që ç’ke me atë punë. Që i kapim dhe duhet të kapim edhe më shumë, sepse që vidhet në këtë vend kjo nuk ka dyshim… dhe që nëse kanë menduar, ose ka menduar dikush që çështja e vjedhjes dhe çështja e paligjshmërisë është një çështje që zgjidhet duke ndërruar një parti me një parti tjetër dhe thjeshtë me shkopin magjik, kjo nuk ndodh. Kjo zgjidhet vetëm me luftë të përditshme dhe natyrisht duke mos bërë dallime…
