Nga Boldnews.al
Pothuajse çdo mbrëmje të javës, në zonën pranë ish-stadiumit “Dinamo” në Tiranë, aktivizohet një post-bllok i gjerë policor, me pjesëmarrjen e efektivëve rrugorë, të Policisë së Rendit dhe Forcave Speciale, këta të fundit të armatosur.
“Detyra” e tyre është kontrolli i imtësishëm i çdo automjeti dhe pasagjerët e tyre, pa asnjë dallim, pavarësisht llojit të mjetit, modelit të ri apo të vjetër, makinë “të fortësh” apo “fakirësh”, siç i etiketojnë shpesh punonjësit e policisë.
Të njëjtët post-blloqe, të përbërë nga 10-15 policë, gjenden edhe në akse të tjera, qendrore apo periferike të kryeqytetit.
Skena është kudo e njëjtë. Punonjësit e policisë, të cilët “egërsojnë” fytyrën për shkak të uniformës nga njëra anë, dhe drejtuesit e mjeteve e shoqëruesit e tyre të sikletosur nga ana tjetër.
Qytetarët detyrohen të dalin jashtë, t’i nënshtrohen një kontrolli të imët fizik, ndërkohë që të tjerë punonjës policie kontrollojnë me detaje automjetin.
Në përfundim, në shumicën absolute të rasteve, qytetarët dalin të pastër dhe largohen me pikëpyetjen: “Përse ishte i nevojshëm ky terrorizim”.
“Boldnews.al” pyeti “off-records” punonjësit në post-bllokun pranë ish-stadiumit “Dinamo” se përse duhen këto kontrolle kaq të shumta, të shpeshta dhe pa një objektiv të qartë, si edhe ku bazoheshin për këto procedura.
Përgjigja për pyetjen e parë ishte e menjëhershme; kontrollet e imtësishme kryhen për të identifikuar elementë kriminale apo sende të paligjshme, si armë, lëndë narkotike e të tjera.
Por, për bazueshmërinë ligjore të këtyre kontrolleve, punonjësit e policisë të orientojnë: “Atë e dinë shefat. Ne na kanë dhënë urdhër dhe duhet ta zbatojmë!”
Kur u thuhet se “një urdhër i paligjshëm nuk duhet zbatuar”, vijimi i bisedës është i pamundur: “Largohu, përndryshe do të procedojmë për pengim të punës së policisë”.
Dhe, në fakt, punonjësit e Policisë në terren, të cilët ngarkohen me detyrën për të kryer kontroll të imtësishëm kuturu dhe masiv në automjete e pasagjerë, pa një objektiv të qartë, urdhërohen pa respektuar asnjë lloj parashikimi ligjor.
Legjislacioni procedural penal dhe ligjit “Për Policinë e Shtetit” kanë të parashikuar qartësisht rastet se kur uniformat blu duhet të kryejnë kontroll fizik dhe të automjeteve të qytetarëve.
Ligji për “Policinë e Shtetit”, në nenin 116 të tij parashikon se kontrolli i automjeteve kryhet kur dyshohet se në brendësi të saj ka sende të paligjshme ose persona të shpallur në kërkim, apo kur punonjësi i policisë ka dyshime të bazuara se kontrolli shërben për të shmangur një rrezik të çastit.
Thuajse të njëjta parashikime të qarta për kontrollin fizik dhe të automjeteve gjenden edhe në Kodin e Procedurës Penale.
Sipas nenit 298 të këtij Kodi lejohet kontrolli fizik dhe i ambjenteve, përfshirë automjetet, në rastet e flagrancës gjatë apo pas kryerjes së një vepre penale, kur duhet ndaluar apo arrestuar ndonjë person i shpallur në kërkim, ose kur ka dyshime se brenda mjeteve mund të ketë sende të lejuara.
Pra, legjislacioni është i qartë dhe ka kushtëzuar rastet e kontrollit fizik të qytetarëve dhe automjeteve vetëm mbi dyshimin e arsyeshëm.
Dhe, “dyshimet e arsyeshme” për policinë, krijohen në përgjithësi mbi informacione paraprake, kur persona apo sende të ndaluara gjenden në objekte të caktuara, përshembull një “Benz i gjelbër” ose edhe thjeshtë “një Benz” apo “një Audi”, ose edhe thjesht “një makinë e vogël” ose “një fuoristradë”.
Në këtë mënyrë, puna kontrolluese e Policisë së Shtetit është më e kufizuar dhe më efektive.
Por, nga verifikimi që kreu “Boldnews.al” në post-bllokun e zgjeruar tek ish-stadiumi “Dinamo”, u konstatua se efektivët blu ndalonin automjete dhe kryenin kontrolle fizike të shoferëve e pasagjerëve pa asnjë dallim.
Këtij kontrolli të imtësishëm iu nënshtruar automjet “Smart”, “Golf 2”, “Benz AMG”, “Mitsubishi Pajero”, “BMW” dhe të tjera mjete të llojeve e ngjyrave të ndryshme.
Personat e kontrolluar ishin vajza, djem, të qethur shkurt, me flokë të gjata, bjond, brun, meso-burra apo mes-gra.
Pra, praktikisht, të gjithë qytetarët që kishin “fatin e keq” të udhëtonin me mjete në atë aks rrugor gjatë kohës që ishte ngritur post-blloku policor.
Duket qartë që uniformat blu nuk kishin asnjë lloj “dyshimi të arsyeshëm”. Ose, për shefat e tyre, çdo qytetar është “i dyshuar”.
Situata me kriminalitetin në Shqipëri është në nivele alarmante dhe puna e Policisë për identifikimin dhe zbulimin e autorëve të veprave penale është për t’u mbështetur dhe inkurajuar.
Por, paaftësia e drejtuesve apo mungesa e informacionit mbi elementët kriminalë apo mungesa e vullnetit për t’i zbuluar ata, nuk duhet dhe nuk mund të rëndojë mbi çdo qytetar që udhëton me automjet në Tiranë (apo edhe në qytete të tjera).
Në këtë mënyrë, nëpërmjet forcës policore dekurajohet një prej lirive kryesore të njohura në Kushtetutë-liria e lëvizjes.
