Afrimet e Partizanit në merkaton e vërës nuk kanë pasur forcën të marrin përgjegjësi dhe të shndërrohen në titullarë absolutë të Kolelës.
Ky është përfundimi i qartë tashmë pas mbi 6 muajsh, që del duke parë minutat e aktivizimit dhe efektivitetin e tyre në fushë. Megjithëse të gjithë nuk kanë ardhur në nivelin e pritshëm, afrimet e Partizanit mund të ndahen në dy kategori.
“KALUESIT” – Mjaftueshëm, do të ishte nota që do të merrnin afrimet më të mira të të kuqve. Këtu hyn Engjëll Hoti, i cili ka shifrat më pozitive, por dëmtimet dhe “fshehja” në ndeshje të caktuara nuk i kanë dhënë shansin të shndërrohet në titullar fiks.
Nga ana tjetër, Viktor da Silva ka vërtetuar edhe njëherë se nuk është i aftë për të përballuar gjithë sezonin fizikisht dhe pjesën më të madhe e ka kaluar në infermieri. Portieri Bekim Rexhepi gjithashtu nuk mund të quhet një transferim i dobët, por as një goditje e madhe. Nga ana tjetër edhe Telushi dhe Atanaskoski i kanë dhënë disa përgjigje kur janë thirrur në detyrë, por pa mundur të bëjnë diferencën.
“NGELËSIT” – Alfred Mensah ka pasur disa herë shansin të justifikojë investimin e klubit, por gjithnjë ka dështuar. Ndërkohë, Marçelino Preka ka qenë gjithnjë i dëmtuar dhe nuk ka arritur ta ndihmojë skuadrën. Menish pritej të shndërrohej në lider të mbrojtjes, por ai nuk ka arritur të tregojë vlerat e tij dhe ka bërë disa gabime. Të larguarit Matej Cvetanoski dhe Aristoteles Romero ishin hije të vetvetes./Panoramasport
