Kryetari i Bashkisë Shkodër, Bardh Spahia zhvilloi një takim me të rinjtë dhe të rejat e qytetit, ku në fokus ishte diskutimi i problematikave me të cilat ato përballen dhe gjetjen e rrugëve të zgjidhjes. Ajo që mbetet shqetësimi kryesor është largimi i rinisë, plagë për të cilën Spahia theksoi se duhet punë dhe koordinim i të gjitha institucioneve shtetërore për ta frenuar këtë hemoragji.
“Duhet menduar dhe duhet diskutuar mbi mënyrat e zgjedhjeve për një problematikë të tillë. Ne mund të mos e zhdukim, mund të mos e eleminojmë plotësisht por sigurisht mund të ndikojmë me anë të politikave tona institucionale që ta zvogëlojmë dhe ta lehtësojmë këtë plagë të madhe të shoqërisë tonë” u shpreh Spahia.
Spahia u ndal tek modeli që ai ka ndjekur prej marrjes së detyrës, atë të kthimit të bashkisë në një institucion të hapur, e ku zëri i qytetarëve të dëgjohet.
“I kam dhënë prioritet padyshim pikërisht kësaj asistence ndaj të rinjve. I stimuloj të rinjtë ta ngrejnë fuqishëm zërin e tyre për të drejtate tyre se vetëm ashtu do të kujtohen t’ju dëgjojnë dhe t’ju ndihmojnë”, tha Spahia.
Në mbyllje të fjalës së tij kryebashkiaku Spahia foli për finalizimin e planit strategjik rinor dhe krijimin e këshillit rinor vendor, që do të jenë zëri i rinisë për zgjidhjen e problematikave dhe thithjen e ideve të tyre.
