Sali Berisha nuk ka kursyer asgjë duke i hapur të gjitha kartat e aferës McGonigal dhe lidhjes së tij me kryeministrin Edi Rama në një nga emisionet e mbrëmjes.
Kreu i PD ka shpjeguar në “NOW” deri në detaje skemën sesi ish-zyrtari i FBI-së u prezantua si “Zot” dhe njeriu që do të arrestonte Donald Trump në Amerikë, në Shqipëri, te një grup njerëzish me pushtet që mund të paguanin miliona për të hequr “damkën” non-grata në Amerikë.
Sipas Berishës, kryeministri Edi Rama dhe Charles McGonigal vendosnin hapur gjoba ndaj politikanëve shqiptarë dhe emrat që sipas tij kanë paguar në mënyrë që t’iu pastronte “biografinë” në Amerikën, janë ish kreu i bashkisë së Durrësit, Vangjush Dako dhe kreu i PSD-së, Tom Doshi.
Përveç tyre duket se në listën e atyre që paguan McGonigal sipas kreut të PD, është edhe një personazh i botës së krimit si Durim Bami, ndërsa disa të tjerë janë kërcënuar me vendosje në listën “non grata”.
“Një vend si Shqipëria, i rekruton me korruptim njeriun më të rëndësishëm të atij institucioni në fushën e spiunazhit. Sot një pjesë e gjykimit është bërë i mbyllur. Ata që e kanë takuar dhe kanë gabuar, të vinte ai këtu dhe të thoshte që jam superspiun i SHBA-ve, çdokush do ta takonte. Edhe unë do ta kisha mirëpritur në tavolinë. Por Rama e shndërroi atë në vrasës me pagesë. Një nga njerëzit që rrinte më shumë me Agron Nezën dhe me të, kur i kërkova të më thoshte dy fjalë, ai pikërisht këtë më tha që “ata ishin gjobvënës”. Gjushit, Tomës, Tomën e kanë marrë me avion e kanë çuar në Vienë. Durim Bamit, etj, i kanë marrë para në sasi të mëdha për t’i hequr “non gratat”. Madje njërit i kanë thënë se na ka çuar Berisha, na hiq non-gratën”, tha Berisha.
Madje sipas liderit të opozitës, ish-kreu i SHISH Helidon Bendo mund të ketë qenë në dijeni të veprimtarisë së McGonigal në Shqipëri dhe hetimeve për të në Uashington.
“Pothuajse po, sepse Helidon Bendo mund të jetë vënë në dijeni të këtyre hetimeve. Ai shkonte nëpër tavolina dhe thoshte unë do të arrestoj Trumpin. Këta e shihnin si perëndi atë. Në ato tavolina, shefi i shërbimit e kishte një vesh dhe nuk ka mundësi të mos dinte gjë dhe besoj se prandaj është dorëhequr nga kreu i SHISH”, shtoi Berisha.
Ndër të tjera kreu i PD ripërsëriti se MCGonigal u ka shkuar në zyrë disa prokurorëve të SPAK për t’u kërkuar hapur arrestimin e tij. Sipas Berishës këtë informacion janë komunikuar vetë pjesëtarët e Prokurorisë së Posaçme.
“Ai kërkonte arrestimin e Sali Berishës, madje me ngulm. Nga burime të brendshme të SPAK, McGonigal ka pasur takime. Ai kërkonte arrestimin e Sali Berishës dhe pse se arrestoni. Ka bërë presion të madh, të pestëve aty, Krajës dhe të tjerëve. Nese mua më vijnë informacione dhe të tjerët s’i dinë, çfarë të bëj, t’i fsheh? Unë do i them, do i them se kanë interes publik këto gjëra”, deklaroi Berisha.
